Riba e dianan 21, 22 y 23 di october 2019 Academie voor Wetgeving bou encargo di Raad van Advies a organisa e Masterclass “Omgevingsrecht”.
Na e masterclass a participa diferente departamento di Gobierno, como tambe representante di Raad van Advies St. Maarten, Departamento Milieu & Natuurbeheer di Curaçao, Stichting Parke Nacional Aruba y Serlimar.
Durante e Masterclass a trata varios punto di legislacion medioambiental, cual ta aplicabel actualmente. No solamente a trata e legislacion actual di Aruba riba e tereno aki, pero tambe e legislacion cu ta na vigor na Hulanda y e islanan BES. Pa termina a papia riba cua regulacion riba e tereno aki falta y e deseo pa realisa esey. Como docente durante e Masterclass a fungi señor prof. mr. dr. Herman Bröring, profesor bestuursrecht na Rijksuniversiteit di Groningen, señor prof. mr. dr. Michiel Heldeweg, profesor Law, Governance y Technology na Universidad di Twente y señor ir. Gisbert Boekhoudt, director di Departamento di Natuur & Milieu, cu ta resorta bou di ministerio di Ruimtelijke Ontwikkeling, Infrastructuur y Milieu. Raad van Advies ta spera cu e Masterclass por a duna un aporte na amplia e conocemento riba e tereno di medio ambiente y pa mehora e coordinacion entre e instancianan concerni.
