Pa mas cu 2 aña caba, Purina tin un iniciativa pa conscientisa nos comunidad. Esaki specialmente na nos muchanan riba e cuido adecua di bestia. Den luna di October y celebrando dia di Bestia. E team di Purina hunto cu otro expertonan den e cuido di bestia ta bishita diferente scol basico pa comparti informacion valioso referente na cuido di nos bestianan.
Expertonan ta inclui entre otro Veterinario Natalie Booi di Animal Care Clinic hunto cu su cacho Daisy. Dr. Booi kende ta siña muchanan e importancia di vacuna pa nan mascota. Esaki ta preveni enfermedadnan peligroso. E muchanan a haya oportunidad pa asisti Dr. Booi den parti di chekeo medico di Daisy y nan por a scucha Daisy su curason.
E la enfatisa tambe e importancia di duna nos mascotanan hopi amor. Ta hopi bunita pa mira con e muchanan ta reaciona y ta keda interesa/fascina pa e cosnan nobo cu nan ta siña.
E biaha aki tambe a conta cu presencia di e K-9 unit pa e iniciativa aki. Nan a siña e muchanan con nan mester comporta nan mes ora di cera conoci cu un cacho nobo.
E enfasis di Purina tabata pa duna informacion di kiko tur bo mester tin na cas pa e cuido basico si bo kier adopta un pushi of un cacho. Desde awa, nutricion, amor, un area safe cu e cacho of pushi por descansa. Tambe e responsabilidad cu nan tin como doño di mascota. Nan ta responsabel pa un otro bida, un mascota no ta un cos di hunga, e ta bida cu ta sinti dolor, hamber, tristesa: asina Ana Maria Ramirez, brand manager di Purina a comenta. A enfatisa e palabra empatia cerca e muchanan. Hopi biaha ta mira cachonan ta sufri riba caya y muchanan tambe por contribui sea bisando un mayor pero nan tambe nan mes tin cu yuda. Ora nan bira mas grandi nan por bira voluntario na un di e fundacionan cu ta yuda bestia y asina contribui di un manera of otro.
E bishita aki a resulta di ta uno hopi leuk, educativo y compartiendo e mensahe. Purina lo ta hopi activo durante luna di october pa celebracion di dia di bestia bishitando tur districto. Purina ta kere cu un persona cu tin un mascota ta un persona mas feliz. Nan kier enfoca riba e relacion di mascota y humano. Mascotanan ta parti di nos famia y mester cuida nan na e manera aki tambe. Tambe kier gradici Veterinario Natalie Booi, staff di Animal Care Clinic y e Team di K9 unit pa ta parti di e iniciativa aki.
