Por medio di un carta awe merdia, presidente di Conseho Electoral di Aruba, mr. dr. Glenn Thode, a informa partidonan politico cu no lo permiti votadonan ta presente fisicamente mañan durante e comprobacion di e resultado di eleccion di diabierna ultimo.
Ya ta algun dia caba cu varios votado, partido politico y controladonan di partidonan na urnanan a señala iregularidad pa cu e control di validez di votonan. Pa e motibo aki partidonan politico y algun votado a pidi un re-conteo di e votonan declara invalido, e cantidad di mas halto cu Aruba a conoce desde aña 1986.
Segun articulo 82 inciso 2 di nos kiesverordening, votadonan ta autorisa pa ta presente den e reunion publico aki pa asina duna oportunidad pa haci peticion di revisa e votonan invalido.
Mienstrastanto, Glenn Thode a emiti un carta awe den cual e ta informa partidonan cu ningun votado lo por ta presente mañan fisicamente, cual ta totalmente contra di locual ley ta prescribi y na e forma aki creando mas duda den comunidad pa locual ta e conteo y e proceso electoral di dia 25 di juni ultimo.
Esaki ta di tantisimo biaha durante e proceso electoral 2021, cu Aruba ta experiencia cu e instituto nacional electoral ta trata di desvia for di locual e kiesverordening ta prescribi.
