Dialuna pa 1:35pm a manda Polis pa Guadalajara Bar na San Nicolas. Ey un prostituta a yama bisa cu nan tin’e cera den su camber.
Na momento cu e patruya a yega na e sitio a topa un mucha muhe canando cu maleta direccion caya grandi. Ora Polis a papia cune, el a bisa e defensornan di ley cu e kier bay su pais bek, mesora, y cu e no kier keda Aruba mas.
Pero e mucha muhe tabata trata e Polisnan masha straño. No obstante cu nan ta uniforma, el a pidi nan pa nan identifica nan mes. Un rato despues el a bira agresivo cu e Polisnan, cu a conduci cu a detene mesora y hibe Warda di Polis pa mira kico ta su problema. A sospecha cu e ta bou influencia di algo.
Una bez na Warda di Polis San Nicolas, a yega e doño di e bar, e homber di inicial R, cu a bisa cu di ayera e mucha muhe ta comporta masha malo mes. Tambe el a bisa cu dialuna e mester a sali pa Colombia pa 3:00pm, locual obviamente e no lo haal mas.
Polisnan a hiba e mucha muhe IMSan pa un control, mientras su representante a bay atende su vuelo pa e sali diamars. Na IMSan dokternan a check su sanger y a saca afo cu e mucha muhe ta bou influencia pisa di cocaina y cu su ritmo di curason tabata te na 128bpm. A hibe Warda di Polis bek ora a caba, sperando pa su representante por a pasa buske bek.
