E luna aki pa prome biaha lo tuma luga na Aruba e Retiro di Emaus. Pastoor Aldrin Jose Soto, di Parokia Cristo Rey di Brazil, a haci e anuncio aki.
Riba dianan 13, 14 y 15 di october awo ta bay tuma luga e prome retiro di EMAUS na Aruba, E ta algo cu ta tuma luga na tur parti di mundo y a logra pa organis’e aki na Aruba tambe awo.
“E ta un retiro special y bunita cu ta yuda nos crece den nos Fe, pasobra nos tur ta pasando den momentonan dificil. E ta un momento pa no solamente re-descubri nos Fe, cu ta importante, pero tambe pa busca un sentido di bida mas importante.”
E prome retiro aki, solamente pa hende homber, ta tuma luga riba e fechanan menciona na Blue Army. Esunnan cu ta interesa pa participa por comunica cu Iglesia na tel. 5847106.
Dia 21 di october tambe Iglesia Cristo Rey ta organisa un concierto di Gospel durante cual ta alaba y adora Dios. Esaki ta tuma luga na Centro di Bari Brazil. Pa e anochi aki lo tin entre otro e grupo di Rejoice, On Fire y God’s Sons.
E meta tras di e concierto ta pa recauda fondo pa restaura y mantencion di Iglesia Cristo Rey, cu pronto lo cumpli 70 aña di e parokia.
Kico ta EMAUS
Desde su fundacion na Miami, na 1978, e retironan di Emaus a bira un fenomeno religioso cu a transforma bida di miles di persona na mundo.
Myrna Gallagher, un muhe di oracion entrega na servicio di Iglesia y movi pa gracia di Dios, a wordo nombra door di Pastoor David G Russell director di Educacion Religioso di Parokia St. Louis na Miami hunto cu un team di cinco hende muhe. Hunto nan tabata kier organisa un retiro den cual e hendenan, ademas di habri nan curason, tin e rempo pa reflexiona, haci oracion y experimento e maraviyoso berdad cu Dios ta amor y cu Hesucristo ta cana banda di e fielnan. Despues a propone na Obispo di Miami pa celebra un retiro diferente di un fin di siman riba e lectura di Evangelio segun Sdn Lucas, 24: 13-35 den e encuentro ey entre e discipulonan di Emaús cu Cristo Resucita durante cual e participantenan por duna testimonio di amor y misericordia di Dios.
Cena na Emaús pa Caravaggio, 1601
Emaús tabata un localidad di Judea, na e luga unda mas despues a bira Imuas, na noord west di e actual ciudad di Jerusalem. Algun investigado ta identific’e como Amwas (Emaús Nicópolis), ubica na 30 km di Jerusalén.
Den e Testament Nobo di Hesus, e atardi di su Resureccion, el a aparece eynan na dos di su discipulonan, cu tabata cana for di Jerusalem pa Emaus. Un di e discipulonan tabata yama Cleogas. E episodio aki ta aparece den Lucas 24,13-35.
