Prome minister Evelyn Wever-Croes a tuma nota di e veredicto di hues awe mainta, unda cu e ta duna Crisisteam rason y ta compronde e decisionnan di gobierno y cu e decisionnan aki ta hustifica den e di dos ola aki.No mester lubida cu na augustus a cuminsa mira e brote di e di dos ola.
Na e momento ey, den corto tempo, ya caba pa september, tabata na 1640 caso cu no ta wega. Ta algo hopi serio e tabata.E mandatardio a indica den un entrevista na Top FM 95, cu mesora na augustus tambe, a cuminsa cu e medidanan di precaucion pa evita cu e cos aki ta sigui sali fo’i man.Un di nan tabata e di dos Toque de Queda. Lamentablemente Ministerio Publico a asumi e posicion cu e lo e no por tabata legal, cual ta lamentabel.No a consulta cu Gobierno prome tampoco.
A papia di dje si, pero ya e daño a keda haci. Ponencia di Ministerio Publico a bay hues caba e ora ey.Prome minister ta aprecia e sosten cu henter e sistema hudicial ta duna gobierno den bringa e pandemia aki cu ta un crisis hopi serio pa Aruba.E no ta solamente un crisis caminda cu tin cu wak e aspecto di salud, tin cu wak tambe e aspecto di economia, di trabao y tin cu wak awor aki e aspecto mas di e salud mental di nos hendenan.Ta compronde cu tur hende ta cansa, tur hende ta fada, constantemente ta bisa pa no haci esaki, no haci esaya. Wever-Croes mes ta cuminsa cansa. Pero ta haci’e no pa pret, no ta haci’e pa molestia.Ta haci’e pasobra kier nos comunidad bon. E unico manera pa combati e plamamento ta si atene na e reglanan.Wever-Croes ta contento cu e veredicto. E ta un sosten di e trabao cu Gobierno a bin ta haciendo for di maart. Un di e puntonan cu ministerio publico a trece p’adilanti, ta cu e prome ola a bin cu un Toque de Queda. Y e di dos ola a bin cu un Toque de Queda.
Pero tin un diferencia entre e olanan.E prome ola ta caminda cu a cera scol, a cera aeropuerto, a bin un shelter in place y a bin cu un Toque de Queda.E di dos ola no a cera frontera, no a cera scol, no a bin cu shelter in place, pero a bin cu un Toque de Queda.Den e punto di bista cu Ministerio Publico a trece dilanti, a haya cu Gobierno mester a bin cu hopi mas medida prome cu un Toque de Queda.Pero hues a sigui e pensamento di gobierno y a bisa cu e virus aki ta causa un crisis cu tin diferente modalidad y proporcion.Y tin cu atende cu cada un den un otro forma. Henter mundo a atende di dos ola diferente cu e prome ola, pasobra e prome ola no tabata sa kico e ta, no tabata sa kico lo a bay drenta aden.Ora cu e di dos ola, apesar cu e cifranan tabata hopi mas halto, por a permiti nos economia sigui lora y cu frontera parcialmente habri. Esey ta pa e aspecto economico y hues a reconoce e importancia di e aspecto economico den e combatimento di e virus.Prome minister ta satisfecho cu esaki. E ta pone si den un situacion poco fastioso, pasobra cu ta den e propio ekipo ta cuestiona legalidad di decisionnan. Pero ta contento cu e decision aki y cu awor aki ta sigui p’adilanti.
