Diamars mainta, Prome Minister Evelyn Wever-Croes tabata di bishita na Colegio Pastoor Kranwinkel pa admira un bunita proyecto di innovacion den enseñansa.
Cada klas a haya borchi digital y esaki ta parti di e proyecto E-Learning. A cuminsa cu e proyecto dos aña pasa y e prome scol scogi tabata Cacique Macuarima.
Hunto cu Futura, e fundacion cu ta yuda den innovacion, a scoge Colegio Pastoor Kranwinkel pa diferente factor. Entre otro e animo cu e docentenan tin, dedicacion y tur esfuerso y inversion cu nan a hinca caba nan mes, pa por yega na medionan digital nobo.
“E resultado di e proyecto na Pastoor Kranwinkel hopi bunita y ta tanto e studiantenan ta come e docentenan ta hopi contento cu e realisacion di e proyecto aki. Ohala cu por a yuda tur scol mesora cu e borchinan aki, pero lamentablemente e fondo no t’ey pa esey. Pero ta great pa mira cu pocopoco ta logra pa asina crea miho fundeshi pa nos comunidad. Mi ta felicita e scol tanto cabesante como docentenan pa e forma con nan a brasa e proyecto y hacie un exito,” Premier Wever-Croes a termina bisando.
