Nos ta contando e ultimo oranan di aña 2022, Prome Minister Evelyn Wever-Croes a bisa den un entrevista radial diahuebs ultimo.
Ta un aña naturalmente cu a bin hopi reto, pero a bin cu hopi cos bunita tambe. Ora cu aña a habri tabatin hopi insiguridad. Wever-Croes tabata hopi insigur di kico futuro ta bay brinda. E tabatin hopi fe y confiansa cu e lo bay ta un miho aña cu 2021. Pero no tabata sigur con cos lo a bay.
Awo, pensando bek, a bisa cu e tabata un bon aña pa Aruba. Aruba ta den pleno recuperacion. Ya nos turismo a logra yega 100% di e nivel prome cu pandemia. E turistanan ta gastando mas. Nos economia ta bons bek, cupo di empleo ta crea, desempleo ta baha. Cu esey ta mira tambe cu tin mas movecion na Aruba.
Pero si nos mira aña pasa, aña a habri nos cu COVID-19 ainda full fledge. Ainda a haya e efectonan di Omicron cu a causa miles y miles di contagio na Aruba. Esey a pone cu e recuperacion di nos pais a stagna un poco, a tranca e desaroyo na Aruba y mundialmente. Despues februari a domin’e hopi bon. Februari ora cu a pensa cu ta saliendo di e garanan di e pandemia, di e crisis di COVID, a haya dia 24 di februari, cu Rusia a invadi Ucrania. Esey ta un guera cu tabata sa cu e efectonan primario lo a bay sinti. El a resulta den un crisis di energia. Pa cuminsa prijs di energia a subi considerablemente. Ta produci hopi gas den e region ey.
Prome minister: “Door di e guera y e sancionnan no por exporta e gas ey. Tur hende mester a bay busca gas y energia hopi mas caro. Esey a resulta den un otro crisis di inflacion. Henter mundo por a mira cu e prijsnan a bira hopi mas halto. Lamentablemente Aruba tambe a sinti e efectonan.
A mira tambe e cambio climatico cu a causa di un banda hopi mas secura y temperatura hopi halto, hopi calor. Y di otro banda hopi mas awasero. Na Aruba tambe por a mira e efecto devastador.
Por a mira cu berdad e aña a resulta di un crisis pa otro. Esey ta siña nos cu nunca mester warda pa cos calma pa por tuma paso pa mehora bo bida, bo famia, bo pais. Bo tin cu sigui nabega den e olanan grandi y percura pa bo yega na un luga cu bo kier yega. Y esey ta loke a haci durante e aña aki. A pesar di tur e crisisnan aki, a pesar di tur e olanan grandi, a sigui traha segun e plan di gobernacion, scuchando loke a biba den comunidad y treciendo alivio caminda cu mester trece.”
Cada ministerio ta trahando duro y ta preparando nan relato tambe pa anuncia y publica durante discurso nacional, cual e prome minister lo duna durante fin di aña, cual lo ta dia 31 di december pa 9:00 pm, cual lo ta den cadena nacional. Eyden lo bay den detaye kico cada ministerio a bin ta haciendo.
Prome minister ta mira atras riba un aña di recuperacion pa Aruba y e ta sumamente orguyoso y eternamente gradicido na cada ciudadano di nos pais. Na esunnan cu ta lanta mainta, traha duro pa hiba nan famia padilanti, hiba nan pais padilanti. P’e comerciantenan cu a kere den Aruba den bon y den mal tempo. Pa esunnan cu ta traha den sector publico, n’e hefenan di departamento cu a traha hopi duro. Na prensa cu a yuda pa difundi tur informacion cu tin. N’e coleganan minister, na parlamento cu a duna gobierno sosten.
Ta mira atras na un aña di recuperacion di Aruba y e ta yena cu fe y optimismo cu 2023 lo bay ta un miho aña pa tur na Aruba.
