Districto di Santa Cruz tabata tin e honor di clausura e prome edicion di e curso Finansa den Mi Hogar. Riba 28 di november, un total di 82 ciudadano a ricibi nan certificado di participacion na e curso Finansa den Mi Hogar den districto di Santa Cruz.
Finansa den Mi Hogar ta un proyecto cu ta wordo organisa y financia door di Minister Geoffrey Wever y desaroya door di Fundacion Plan di Bida. E curso ta wordo duna den tur districto di Aruba. Districto di Santa Cruz ta bira asina e di seis y ultimo districto cu a participa na e prome edicion di e curso Finansa den mi Hogar.
Participantenan na e curso Finansa den M Hogar a ricibi durante cuatro sesion informacion y tipnan valioso riba con pa ta efectivo den bo hogar, paga debe, inverti den futuro y presupuesto. Ta importante pa nos ta consciente riba nos entrada y gasto y con esaki ta afecta nos stabilidad y metanan financiero. E curso ta enfoca pa bira critico riba nos decisionnan financiero y tambe riba nos actitud cu por afecta sin cu nos sa, e cartera.
E curso Finansa den mi Hogar ta forma parti di maneho economico di minister Geoffrey Wever pa stimula consumidornan di Aruba bira mas consciente y critico. Un consumidor consciente y critico ta e fundeshi di un economia inclusivo y duradero. Facilita e curso gratis aki lo duna e ciudadano, e consumidor, e habilidad riba e maneho financiero di su entrada y gastonan. Un habilidad cu ta necesario pa evita problemanan financiero manera debe pa biba mas miho y mas comodo.
Pa trece e curso mas cerca di e ciudadanonan, ta ofrece e curso gratis den tur districto di Aruba. E curso a start na Paradera, despues a bay San Nicolas, Oranjestad pa continua na Savaneta y Noord. Y awor e di seis y ultimo grupo a participa na e prome edicion di e curso Finansa den Mi Hogar na districto di Santa Cruz.
“Ta importante pa nos ciudadanonan por yega y participa na e curso cerca di cas. P’esey e meta pa ofrece e curso Finansa den mi Hogar gratis, den tur districto y cerca di nos ciudadanonan”, minister Geoffrey Wever a bisa.
Minister Geoffrey Wever ta gradici cada ciudadano cu nan participacion na e prome edicion di e curso finansa den mi hogar y ta invita tur ciudadano pa keda pendiente pa e segundo edicion di e curso den 2024.
