Yolo Cockails & Tapas ta un establecimento nobo nobo situa den The Cove Mall, dilanti Paseo Herencia. Como preparacion pa nan apertura, a dicidi di haci un donacion na comunidad. Amado Baroud, conoci den mundo di fotografia,a splica cu propietarionan di e negoshi nobo aki a dicidi cu nan mester haci algo pa por lo menos un grupo di comunidad.
Nan a traha cierto cantidad di basket y a yama e personanan cu nan ta consciente cu ta pasando den problema pa pasa busca esaki. E basketnan ta varia y ta selecta a base di loke ta necesario. A haya lista for di instancianan y hendenan cu nan mes conoce cu ta pasa den problema, y a scoge esnan cu ta haya un box.
Zobaida Franken – Akkari ta propietario di e lounge innovativo aki cu tabata programa pa habri dos siman prome cu e crisis a cuminsa. “Nos a dicidi di haci e acto aki pasobra hopi hende no tabatin chens di come ni pan ora nan lanta mainta y a dicidi di haci algo pa nan.”
Tambe el a splica cu Yolo ta un concepto di cocktail & tapa. E ta un area sofistica pa amigonan topa y disfruta di un momento agradabel. Tur dia ta bay tin musica, tiki relax. Nan eventonan semper por wordo sigui riba Facebook. “E un luga pa amigonan pasa un rato bon cu otro,” Zobaida a bisa. El a agrega cu tin diferente seccion, paden, pafo y un seccion di VIP.
