Dia 4 di maart ultimo Universidad di Aruba a organisa un seminario relacona cu Dia Internacional di Hende Muhe. E ultimo aki ta celebra internacionalmente dia 8 di maart proximo. Riba e dia aki ta reflexiona y conmemora e logronan cultural, politico como tambe socio-economico di e hende muhenan rond mundo. Ta enfoca e atencion global riba igualdad di genero, prehuicio, stereotipo y discriminacion cu e obhetivo pa mundo bira mas diverso, igual y inclusivo pa hende muhe.
Asina Deborah Alexander, coordinadora di Center for Livelong Learning di Universidad di Aruba, a conta cu a organisa e seminario den coordinacion cu gobierno di Aruba como tambe Instituto Pedagogico Aruba (IPA). Titulo pa esaki tabata ‘The Advancement of Women’s Education on Aruba: Quality of Education and Gender Equality’. Alexander a splica cu a enfoca riba calidad di educacion y igualdad di genero, cual nan ta considera di suma importancia pa e desaroyo di hende muhe na Aruba.
Cu un sala completamente yen di participante, Alexander a considera cu esaki ta nifica cu hopi hende muhe tin interes riba e topiconan aki y ta contento cu esaki ya cu nan kier a trece e discusion aki pa dilanti como tambe dialoga riba e presentacion di e ‘policy’ di ‘gender equality’ di nos minister president. Pues, ta prome biaha na Aruba cu ta skirbi un ‘policy’ tocante e rol di hende muhe den nos comunidad y e plannan di accion relaciona cu esaki.
Pa un relato mas amplio lesa edicion di TREMPAN.
