Cu yegada di Celebrity Millenium, ta pone un fin na e espera di 15 luna cu e industria tabata practicamente inactivo.
E crucero a sali fo’i Sint Maarten y a pasa Barbados, Aruba y Corsou, despues bay bek Sint Maarten.
Cu e yegada aki, Aruba ta forma parti di su itinerario den henter Caribe, desde cu COVID-19 a causa un paro den e industria crucero.
Pa APA esaki tabata un momento di hubilo, no solamente pa a ricibi e prome Crucero despues di e paro, pero alabes a celebra e hecho cu nan ta celebrando 40 aña di existencia e aña aki.
Pa awo, Celebrity Millenium lo bishita Aruba pa e luna di juni y despues lo reemplasa esaki cu Celebrity Summit pa juli y augustus.
Pa haci esaki posibel, mester a adapta nan protocol di salud, hunto cu e instancianan di salud di Merca y tur e otro islanan unda nan ta bishita den nan itinerario.
Minister di Turismo, Dangui Oduber a comenta cu e dia aki sigur ta uno di alegria, cu despues di 15 luna Aruba ta ricibi barco crucero cu turista abordo. Esaki ta un momento historico, e mandatario a remarca. E pakico cu a pone Aruba den nan itinerario, pasobra nan ta considera nos pais un destinacion sigur y tambe e grado di vacunacion di nos comunidad, cual ta yegando 66%. Tur esey a contribui cu Celebrity a dicidi pa hinca Aruba den su itinerario di luna di juni.
Esaki sigur tabata un reto convence nan pa bin Aruba, mirando cu ainda nos ta den pandemia.
Di parti di Prome Minister mr. Evelyn Wever-Croes, e ta comenta cu ta un dia caminda cu ta drenta den un otro etapa di recuperacion. Esey ta yen’e cu hopi emocion.
Tur e esfuerso aki ta un sinergia completo di no solamente gobierno, sino di hopi otro instancia pa yega asina leu. Manera e frontliners cu a cuida nos hopi bon y a percura pa nos a pasa den e temporadanan dificil cu e medidanan estricto, tur ciudadano cu a cuida, cu a tuma e pandemia na serio, cu a vacuna, cu por a flexibilisa e medidanan.
Cu yegada di Celebrity Millenium, sigur ta un paso mas pa recuperacion di nos economia y nos turismo.
Pa mas detaye lesa matutino TREMPAN.
