Andrew Hoo, director interino Inmigracion Aruba, den combersacion cu 24ora a sigura cu introduccion di e programa Happy Pass no ta stanca. Al contrario, e di dos fase ta bay cuminsa pronto.
Tabata aña pasa na luna di maart, 2023 cu Minister di Turismo Dangui Oduber a anuncia implementacion di e proyecto piloto Aruba One Happy Pass (AHOP). Esaki ta un aplicacion mobil cu ta manera un ID standard. A crea e aplicacion pa pasaheronan por medio di cooperacion entre Aruba Tourism Authority (ATA), Inmigracion Aruba (IASA), SITA y Indicio.
E aplicacion aki lo ofrece pasaheronan e opcion pa yena y cumpli cu tur rekisito di inmigracion prome cu nan aborda nan avion haciendo uzo di credencialnan digital. Na final ta haya e confirmacion ‘ready-to-fly’ status prome cu nan subi nan avion rumbo pa Aruba. E meta di Aruba AHOP ta pa streamline y haci e proceso di control na aeropuerto mas eficiente, reduciendo e oportunidad di comete eror, fraude of robo di identidad. Esaki lo resulta den menos tempo di espera na aeropuerto pa e pasaheronan y crea un experiencia mas placentero pa nan por yega nan destino mas lihe.
Den combersacion cu Andrew Hoo, el a splica cu contrario na cualkier pensamento, e programa aki no ta tranca. E ta den full swing, pero e ta un pilot, pues algo di prueba. E prome fase a tuma luga aña pasa, unda a saca diferente glitches. Y awo ta den e di dos fase di e programa piloto aki, cu ta conta cu e sosten financiero di entre otro ATA y Gobierno, ta loke Andrew Hoo a declara.
KICO E TA
Ta trata aki di un programa piloto unda cu aña pasa a test esaki riba trahadonan mes di e companianan envolvi pa mira con e ta funciona. Awo den e fase aki ta poni cu ta procesa maximalmente 30 persona den e programa piloto. Ta papia solamente di e mercado Mericano. Y e no ta algo cu ta bay automatico. Na momento cu un persona cumpra su ticket pa biaha pa Aruba, ta puntr’e si e kier participa den e programa piloto y ta splic’e kico e proceso ta encera. Aunke cu ta 30 hende ta tuma pa dia den e fase aki, e cantidad mas grandi di hende cu a yega di haya ta 6 pa dia.
Segun nos por a compronde, a penas e programa aki ta den su fase inicial, unda cu ta test solamente e parti di entrada di pasahero, falta ainda pa test ora di salida. Banda di esaki falta pa yega tur e ekiponan necesario y e seccion apart den cual ta bay ehecuta henter e proceso di biometri. Pues tin un caminda largo ainda pa bay.
