Polis tabata tin su mannan yen cu no solamente accidente, pero tambe varios problema cu tabata surgi aki aya. Un di e casonan aki tabata na Palm Beach, caminda cu problema a start entre varios persona.
Tin papia tambe cu tabata tin machete envolvi. Un persecucion a tuma luga di parti di Cuerpo Policial, unda cu finalmente varios detencion a cay riba e caminda di Sasakiweg y tambe na Palm Beach. Algo pasa di 4’or y mey di marduga, segun informacionnan ricibi, un Mitsubishi Colt color di oro, numera A- 67419, lo tabata persiguiendo un Hyundai Elantra color blauw, numera A-38963 riba Sasakiweg.
Durante e persecusion, menasanan a cay den direccion di e chauffeur di e Elantra. Dado momento e Mitsubishi lo a alcansa e Hyundai, cual pa su mala suerte a bay dal den un palo di luz di trafico. Akinan e Hyundai a keda basta kibra. Un poco panort di Domino’s Pizza, polisnan atento a para e Mitsubishi Colt, cu tabata persiguiendo e Elantra, a logra para esaki na un manera tactico.
Una bes cu a para e auto, a baha e ocupantenan y pone tur drumi abao, pa polis sigui haci su investigacion. Por a nota cu un di e ocupantenan di e Mitsubishi, tabata tin un kap basta bon na cabes. Y un otro tabata tin un herida na su man. Polis a tuma dato di tur cos di loke a sosode. Tambe polis a para dos persona den un Toyota Altezza, na altura di Unicasa Supermarket, di sospecho cu nan tambe tabata envolvi den e sucesido.
Ta trata aki di un hende homber y un hende muhe. Tabata ta un cooperacion en conhunto di basta miembro di polis pa asina caba cu e problema cu tabata andando for di riba Sasakiweg. E Mitsubishi Colt a keda confisca y hiba warda di Shaba. Mientras tanto, takelwagen a kita e Elantra for di caminda, ya cu e no por a move riba su mesun forsa. Tremendo trabao di Cuerpo Policial.
