Diahuebs mainta, algo pasa di 4:00am, a sosode un storing den un transformer di suministro interno den planta di WEB Aruba NV. Esaki a resulta den un serie di problema significante, incluyendo un fayo masivo di un transformer mas grandi cu ta conecta riba e sub-station di WEB, cual a causa un interupcion na e sistema di suministro di coriente.
E fayo di e transformer grandi den dos feeder di ELMAR, a causa interupcion di coriente cu a afecta diferente bario rond di nos isla. E situacion a pone e team di WEB dilanti di un otro reto, pero mesora nan a drenta den accion pa asina acelera e proceso di recuperacion di suministro.
Un investigacion detaya lo tuma luga pa determina e causa preciso di e fayo. Esaki ta crucial pa preveni futuro incidentenan similar y pa sigura cu nos sistema di suministro ta keda na su maximo nivel di eficiencia y siguridad.
Den e momento critico di e storing, e team tecnico di WEB a traha sin descanso pa restora e suministro di coriente mas rapido posibel. Ya pa 4:45 AM, ELMAR a comunica cu e barionan afecta a recupera suministro di coriente.
WEB Aruba NV ta consciente di e incomodidad y molester cu e interupcion a causa na nos comunidad y ta lamenta profundamente e inconveniente. Nan ta compromete pa investiga e incidente a fondo y pa tuma e medidanan necesario pa preveni cu asina algo no ripiti den futuro. Nan ta ofrece nan sincero disculpa pa e interupcion y ta gradici nan clientenan pa nan comprension y pasenshi.
