Ta basta cos a bini dilanti durante tratamento di e caso di matamento cu a tuma luga dia 23 di augustus, 2025 na Coba Lodo. E homber Israel Paesch a tira y mata su primo, Rene Paesch, di tres tiro.
Pero ta resulta cu e asunto aki no ta algo cu a cuminsa aña pasa. Den corte Israel, kende no ta corda mucho cos despues di e marduga cu e echo a tuma luga, a bisa cu e tabatin miedo cu cualkier momento Rene por a mat’e.
E dos primonan tabata envolvi den un caso di atraco arma rond di 2013 y nan a haya condena di 5 aña. Ambos a sali na 2018, pero Israel seis luna prome cu Rene.
Segun Israel a conta den corte, e no tabatin problema cu su primo y ora cu el a topa cu ne na un fiesta, hasta el a bis’e cu e por yud’e haya trabou, pero el a nenga. For di e momento cos a cuminsa bay malo. “E ta bisa cu ami a keda cu placa di un atraco,” e acusado a conta. Pero el a bisa hues cu esey no ta berdad. “Di cuanto placa nos ta papiando,” a puntra Israel. Y su contesta tabata: 3500 florin.
Dado momento hasta su tata a ofrece pa paga e placa en cuestion pa evita mas problema, pero Rene a nenga. “Israel mester paga.”
Di otro banda, ex-partner di e acusado a bira despues partner di Rene. Y e ta kere cu esaki tambe a hunga un rol den e problemanan. Unda cu e mira Rene, e ta lansa menasa contra dje of ta maltrat’e.
Prome cu e caso fatal di dia 23 di augustus, ya caba tabatin tres incidente di menasa y maltrato: dilanti Well Well na Hooiberg, na Casuela y e ultimo tabata dilanti Lekker. E ultimo biaha Rene a dal’e mokete lag’e cu wowo y cara hincha y blauw, nanishi kibra y el a perde conocemento.
Tabata e incidente ariba menciona, di loke el a declara prome bes na polis, a pone tuma accion. Tanto na Polis como den corte el a bisa cu e tin miedo cu Rene por haci algo mas pio. P’esey na momento cu un persona a ofrece un arma, el a cumpra esaki na inicio di 2025. Un arma cu e tabata sconde riba dak y sa sali cu ne de bes en cuando.
Lamentablemente e conflicto aki a finalisa cu morto di Rene y Israel den KIA, lagando dos famia den tristesa y den problema. Awe hues a puntra Israel si awe, despues di tur loke a pasa, e lo actua diferente su contesta tabata si. E lo a bay Polis ora cu e problemanan a cuminsa. “Na final e ta keda mi primo y mi ta lamenta loke cu a pasa. Sorry, disculpa mi, el a bisa e famia di Rene.
A pidi 13 aña pa Israel y lo tin sentencia dia 10 di juli awo.
