Presidente di SMAC, e fundacion cu tin e permiso pa organisa tur actividad carnavalesco e temporada aki, a duna un aclaracion riba disputa cu tin cu Stichting Musica. E ultimo aki ta representa tur musiconan di Aruba.
Presidente di SMAC Darren van Ommeren a cuminsa pa bisa cu no tin problema cu Stichting MUSICA. Solamente cu e fundacion mester cera un contract cu SMAC y busca fechanan riba cual lo por organisa e festival di Caiso y Soca.
For di tres luna caba MUSICA a haya den nan email e contracto cu mester cera cu SMAC pa organisa e festival aki riba e fechanan di 26 y 27 di e festival. Pero no a ricibi contesta concreto riba e contracto, si ta firm’e, y e pago. E ultimo aki a vence dia 30 di december ultimo. Dia 31 di december a manda email pa informa cu MUSICA no a cumpli y a revoca e fechanan di 26 y 27.
Aworaki, segun van Ommeren, loke cu mester haci ta sinta na mesa pa yega na fechanan nobo. For di aña 2022 a bin ta purba pa sinta na mesa cu e fundacion, debi cu SMAC a bin ta haci diferente cambio na bienestar di e celebracion.
Kisas, e ta bisa, nan no a tuma e asunto mucho na serio. Tin caminda pa cana y tin cosnan cu mester cumpli cu ne. Pa MUSICA por organisa e festival, e mester paga SMAC un fee. E fee ta pa por organisa e genero di Caiso y Soca. E ta protege e mesun MUSICA pa niun otro organisacion organisa festival.