Na september ultimo minister di finansas a celebra cu el a entrega un presupuesto na ora. Parlamentario mr. Gerlien Croes a tuma nota cu e documento tabata compaña pa conseho di CAFT y Raad van Advies basa riba introduccion di BTW. E consehonan aki ta loke e parlamentarionan ta uza pa analisa e contenido y evalua con e lo vota riba dje.
Tras e diferencia di ponencia entre Minister di Asuntonan Economico, mr. Geoffrey Wever y Prome Minister Evelyn-Wever Croes hunto cu Minister di Finanzas, Xiomara Maduro riba si mester bin BTW of BBO, a anuncia cu ta hisa e ultimo aki cu 1%
Awo como un politico responsabel, Croes a comenta, si bo sa cu bo ta bay haci cambio den locual cu bo ta presenta na Parlamento di Aruba, bo ta manda e cambio aki bek na Raad van Advies y bo ta bisa nan: “ey e conseho cu b’a manda basa riba e BTW mi no por us’e of mi no ta bay manda parlamento e asina’ki. Por fabor ‘nami un conseho nobo.”
Di nan banda, oposicion completo consistiendo di partido AVP, Accion 21 y MAS a manda dia 5 di september un peticion na presidente di parlamento pa hala aden e presupuesto y pidi un conseho nobo di Raad van Advies, paso esey nos constitucion, e ley di mas halto na pais Aruba, ta bisa. Dia 12 di september, minister president a manda un carta bisando cu no ta bay cambia ningun presupuesto, cu asina e ta keda y asina e ta wordo trata.
Oposicion, representando casi 19800 voto di e pueblo, a manda un di dos carta pa presidente di parlamento, mr. Edgard Vrolijk pa yama un reunion pasobra loke ta pasando ta bay contra ley y parlamento no por trata un presupuesto cu no tin un conseho manera debe ser. Mientras cu, segun reglamento di ordo, Vrolijk tin e deber di yama e reunion ora un peticion drenta, el a ignora esaki.
Na momento cu dialuna mainta a habri sesion pa cuminsa cu e tratamento, lider di fraccion di AVP, mr. Mike Eman a bis’e: “tende aki no ta abo ta dicidi. Aki’den bo tin cu puntra sala. En todo caso tur fraccion kico nan ta pensa.” Fraccion di MEP y RAIZ a sali bisa di biaha “no, nos no ta di acuerdo cu presupuesto bay bek. Nos ta bay trat’e asina’ki manera cu e ta.”
Pa e relato completo, lesa edicion di TREMPAN
