E calender nobo di e Sanctuario di burico a wordo presenta den un manera hopi festivo cu bolo y koffie. E conocido periodista Nico van der Zee a entrega e prome calender na Sra. Rona Coster, un local y popular publicist, periodista y columnist.
Sra. Coster a wordo escohi pa e honor aki door di su trabao incansabel den buska di sponsors pa e dak nobo di e Visitor Center. Su entusiasmo y drive a logra realiza e projecto aki.
Normalmente Manager Desiree Eldering ta hasi entrega di e prome calender, pero door di malesa e no tawata por. Tampoco e fotografo di e ultimo 10 calender di Burico no tawata available pa saka potret. Pesei mes a pidi varios amateur y fotografo professional pa saka potret y mandanan aden. E resultado tawata 13 bunita potret di burico saka door di 8 fotografo. Un kaft y 12 luna di potret ta mustra nos buriconan den prima form.
E Sanctuario Arubiano, fotografonan Arubiano, y nos burico Arubiano ta mustra nos orguyo di Aruba den nos calender. E calender ta na benta na e Sanctuario di Burico, na Superfood, Veterinario Contreras y na beauty salon En Vogue. Y tur entrada di e benta ta bai pa cuido di e buriconan, ya cu e 12 sponsors a cubri gasto di produccion di e calendernan. Pa solamento fl. 25.00 bo lo bira donjo di un bunita calender di nos burico Arubiano.
