Durante Fiesta Arubiano na Centro di Bario Noord ta otorga premio Meneer Ovito Tromp na Rosalinda Luydens.
Rosalinda Concepcion Luydens, miho conoci como Tante Lily, a nace na Aruba dia 14 di Augustus di aña 1940. Lily; un persona humilde, trahado y di poco palabra. E ta e di dos di cinco yiu di Jose (Joe) Luydens y Cecilia(Chia) Luydens.
Tanta Lily tabata forma parti di A.M.G. cual despues a cambia bira A.J.M.G. , e tawata un “Amica”. Hopi hoben di Noord a pasa na su man y a siña hopi di dje.
E tawata un persona hopi activo den parokia di Noord, e la traha cu soeur por ehempel cu Soeur Erica y Soeur William.
Tanta Lily tabata den yen di grupo di oracion di Noord. Pero mas conoci grupo di Ring Faro cual tabata cana bay Kapel di Alto Vista bay resa mainta trempan.
Tambe Tanta hunto cu Margarita Roza tabata bay resa na cas di hende grandi.
E tabata den yen di grupo di oracion di Noord. Pero mas conoci grupo di Ring Faro cual tabata cana bay Kapel di Alto Vista bay resa mainta trempan.
Tambe Tanta hunto cu Margarita Roza tabata bay resa na cas di hende grandi nan. Tambe pa un temporada hopi cortico Tante Lily hunto cu un otro señora tabata duna les di confirmacion aki na Noord.
Na aña 1967 den cunucu di Boegoeroei tante lily a lanta un carnaval chikito pa e mucha nan di cunucu. Nan a kies un reina pone cantica y baila riba e ritmo di e mucha homber nan cu tabata bati riba bleki ta purba toca manera steelband. Semper e tabata conta con e la yega na e idea, cu e la wak e mucha nan no tabata tin cos haci y cu tabata sinti laf y e tempo ey mester a bay te playa pa wak carnaval y no ta tur mucha por a yega te ey, e ora e la dicidi di haci un “carnaval” chikito pa nos mucha nan di cunucu por gosa. Tempo ey nan tabata cuminsa dilanti cas di su Madrina cu yama Chiguela(Minguela Luydens, BGR #76) nan tabata baila full den cunucu y despues bay caba dilanti cas di Papa Jose(Joe Luydens) na BGR #90. Un ruta hopi chikito pero cual e mucha nan tabata gosa hopi. Na final Tante Lily tabata traha un jug grandi di Kool-aid pa tur mucha bebe. Poco poco e carnaval a keda crece , despues e la subi caminda y te cu e la yega na e ruta cu tin awo.
Na 1975 e la cuminsa traha na Chikitin Bin Bin na Centro di Bario Noord.
Lily tabata un di e prome personanan cu a wordo acerca pa a cuminsa cu e programa di cuido di mucha di 0 – 4 aña den Centro di Bario Noord,e tempo ey e tabata traha boluntariamente.
Lily tabata un ehempel pa demas lidernan con e tabata trata y cuida nos chikitonan y con e tabata comunica cu e mayornan.
Durante añanan Lily a realisa hopi idea pa cu e futuro di e school, cual despues a haya e nomber “Chikitin Bin-Bin”.
Ideanan cu tabata exigi esfuerso y bon boluntad pero su semper mester ta uno cu por wordo realisa. Den añanan 1995 pa 2000 a haci trabou y actividadnan boluntario pa progreso di “Chikitin Bin-Bin” cual tabata algo normal pa Lilly. Tanta Lily a traha te cu su 60 aña na school “Chikitin Bin-Bin”.
Den 2014 a realisa e di dos parti di expansion di school y “Chikitin Bin-Bin” a haya un plenchi pa e muchanan por hunga. E plenchi ey a haya e nomber di “Plenchi Tanta Lily. A escohe pa dedica e planchi na su nomber pa asina por a duna balor y aprecio naTanta Lily su trabounan desplega pa e muchanan chikito di Noord y bisendario.
Ey e la eherce su amor y pasion pa mucha nan chikito. E la traha hopi aña ey, te na un edad grandi.
Na aña 2002 e la cuminsa traha na Wit Gele Kruis na Noord como werkster.
Den añanan 2000 tambe Tanta Lily tabata organisa caminda di cruz den cunucu unda cada cas tabata haya un stashi.
Na 2013 e la dicidi despues di hopi aña ta traha pa Noord pa porfin bay cas y sosega.
CBN ta gradici Steve Geerman, Sobra-Sobrino di Tante Lily y Carmen Frans pa a scirbi e cv di Tanta Lily pa nos.
