Recientemente, como Presidente di Comision Fiho di Enseñansa di Parlamento y na mes momento representando Minister Endy Croes cu no tabata por ta presente, Parlamentario Shailiny Tromp-Lee a asisti na un tremendo anochi caminda Kiwanis Club of Aruba a otorga pa di 27 biaha e Premio Clint Whitfield na studiantenan di Colegio Arubano cu a sobresali den e aña escolar tras di lomba.
Durante e actividad aki en total shete studiante a keda premia no solamente pa nan logronan academico durante aña escolar 2022-2023 pero tambe pa nan cualidad y logronan personal. Tromp-Lee tabatin e honor pa hunto cu Presidente di Parlamento mr. Edgard Vrolijk, Presidente di Fundacion Clinton Whitfield, Harold Pereira, Directora suplente. di Colegio Arubano, Lixanne Gemerts y Presidente y Representante di Kiwanis Club of Aruba, Edbert Schwengle y Indra Pereira pa haci entrega di e premionan.
E premio aki sigur ta forma parti di e meta di Kiwanis pa haci un diferencia yudando nos muchanan crece y ta exitoso den bida. Y e anochi aki sigur a subraya y celebra logronan di exito di shete hoben cu sigur a y ta sobresali pa loke ta trata nan cifranan.
Ta trata di hobennan cu practicamente 10 y 9 so riba nan rapport. E studiantenan cu a ricibi e Premio Clint Whitfield ta: Christian Balza Jinete- CB1, Karol Rosales García -CB2, Jouelle Farro- HAVO 3, Sanne van Doorn- HAVO 4, Evie van der Sloot- VWO 3 (a ricibi e premio caba na 2020-2021 y 2021-2022), Sammir Sue- VWO 4 y Clinton Roga- VWO 5 (a ricibi e premio caba na 2018-2019, 2019-2020, 2020-2021 y 2021-2022).
Hopi special pa Tromp-Lee tabata e parti caminda cada hoben a comparti cu publico na ki manera nan ta logra ta asina exitoso na scol. Tin ta uza pintamento, otro skirbimento, otro ta planifica debidamente y tin kier ta djis e miho y cada biaha supera su mes. Ta hobennan cu na mes momento a keda treci padilanti pa nan mentor cu nan ta hopi creativo y ta ‘think outside the box’. Berdaderamente impresionante
El a acentua e echo cu e premio cu nan a ricibi ta un aplauso pa nan trabou duro, perseverancia y disciplina. Ademas, mester subraya cu e anochi ta un anochi caminda e studiante por ta orguyoso di su mes, mayornan orguyoso di nan yiunan y maestronan orguyoso di nan studiantenan, pa a logra ta e miho.
Mas aleu, Tromp-Lee a enfatisa na e hobennan cu nan mester ta hopi agradecido na nan mayornan y tur demas personanan cu ta sostene y guianan y a pidi nan pa nan uza nan habilidad pa contagia otro hobennan cu nan candela y espirito di exito. Ban spera cu e reconocemento cu nan a ricibi bira un fuente di estimulo pa sigui tin e espirito di exito y pa cada biaha nan tin e deseo di sigui supera nan resultadonan. Mi ta convenci cu esaki sigur lo habri portanan grandi pa nan.
Por ultimo, a gradici Kiwanis Club of Aruba pa e oportunidad brinda di por a forma parti di e bunita anochi aki y pabien un biaha mas na tur studiante, nan mayor y educadornan.
