Siman pasa tabatin decision den e caso cu un miembro di Sindicato Empleadonan Publica y Priva di Aruba (SEPPA) a cuminsa contra Post Aruba N.V. pa e hecho di no a cumpli cu provisionnan den e Contracto Colectivo cu mientrastanto a vence.
A trata e caso aki na final di mei. Tabatin un CAO cu duracion di 3 aña den cual a haci varios palabracion. Pero esai a vence dia 31 di december, 2012.
Den e CAO tin un provision cu ta bisa cu si no yega na un acuerdo nobo, esun bieu ta keda vigente, den consulta cu otro. Articulo 25 di CAO ta papia di un adaptacion salarial anualmente, cu ta tuma luga den luna di januari y ta papia di un suma di 105 florin.
Post den un carta fecha 28 di augustus, 2013, a anuncia cancelacion di e CAO cu e fecha di 31 di december, 2013. Den e periodo di 2014 pa 2020 anualmente a paga e suma di 105 florin bruto na su trahadonan. Na 2021 a paga un suma den forma di lumpsum, esta 12×105 florin.
Na januiari, 2022 y 2023 no a paga nada. A pesar di tur e proposicionnan manda pa Post, no a logra na un acuerdo cu e sindicato riba pago di e aumento di salario aki.
E miembro di SEPPA a pidi Corte pa declara cu e CAO bieu, door cu no tin uno nobo, keto bay ta valido y cu Post a falta pa cumpli cu e CAO. Tambe a pidi Corte pa ordena Post, pa cumpli te ora cu e CAO finalisa di un forma legal.
E prome pregunta cu Corte mester a contesta den e caso aki ta cu si e CAO en cuestion ta valido ainda. Post di su banda a bisa cu e CAO aki a vence for di 2013 ora cu nan a cancela esaki oficialmente via di un carta, pa cual un Corte no por bay di acuerdo cu e demanda aki.
Pero den e CAO ta para tambe cu si despues di e fecha di 31 di december, 2013, no yega na un acuerdo den cierto tempo stipula, toch e CAO bieu ta keda vigente mientras cu ta den negociacion.
No ta den discusion cu e negociacionnan pa un CAO nobo no a finalisa y tampoco si tin otr palabracion haci.
Esaki, segun Corte, ta trece cu ne cu contrario na loke Post ta bisa, e CAO cancela ta keda vigente y e condicionnan den esaki, incluyendo articulo 25 di e aumento di salario anuamente ta keda valido.
E hecho cu e empleadonan durante 2021, debi na Pandemia, a bay di acuerdo cu pago di esaki den un forma di lumpsum (un biaha 12×105 florin) en bes di e aumento di salario palabra, no ta kita nada di e situacion.
Corte a remarca cu e expresion cu e tempo ey a haci palabracionnan cu ta bay mas leu cu e aumento salarial cu debe pa e aña ey, no a trece hecho pa probe.
Post a trece dilanti cu e sindicato a para e negociacionnan y awo ta nenga di sigui cu esaki, pa mantene e indexering na vigor. Si esey ta e caso, Post mester atende di un otro forma.
Corte ta bisa cu mester paga e suma bruto di 105 florin den luna di januari. Y mirando cu for di 2022 no a paga esey, esaki ta nifica cu Post debe e empleado(nan) esaki.
Aunke cu Post a bisa cu su situacion financiero ta haci cu e aumento salarial no por sigui di e forma aki, pasobra e compania pa hopi aña caba ta bancarota y ta artificialmente na bida danki na Gobierno.
Como cu no a demostra esaki cu hechonan concreto, sin ningun documentacion, no por bisa cu e situacion financiero ta di tal indole cu sigui duna e aumento aki ta inaceptabel.
Tur esaki ta trece cu ne cu Post mester cumpli cu articulo 25 di e condicion poni den e CAO, cu tur aña den luna di januari mester duna e aumento di 105 florin. Te ora cu yega na palabracionnan nobo of te ora cu tin un CAO nobo.
No a mira motibo pa pone un multa si Post keda sin cumpli ya cu ta confia cu nan lo sigui veredicto di Corte. E otro demandanan ta rechasa.
