Dia 31 di oktober 2018, Post Aruba N.V. a emiti un serie nobo di “Stampianan di Fauna (Animalnan domestico) 2018”.
E serie ta consisti di seis (6) stampia balora na 90 cen, 100 cen, 130 cen, 135 cen, 220 cen y 500 cen, cu ta yega na un prijs total di Afl. 11,75 y e ta acompaña pa su ‘envelop di prome dia di emision’ cu ta costa Afl. 13,25.
E diseñonan pa e stampia aki ta un creacion di Elvis Tromp y e stampianan ta imprimi na Johan Enschede Security Print.
Nos ta cria e animalnan domestico (mascotanan), manera ta ilustra riba e stampianan, principalmente sea pa nos tin un compañe, pa proteccion of pa entretenimento.
E animalnan domestico mas popular ta cacho y pushi.
Sinembargo, tin otro animalnan cu tambe nos ta cuida, manera: coneu, turtuga y morocoy, pisca di awa dushi, lora, parha y hamster, djis pa menciona algun.
Un mascota ta brinda su doño algun beneficio tanto fisico como emocional. Ora bo ta cana cu bo cacho, tanto abo como e cacho ta haya ehercicio, aire fresco y tambe un interaccion social. Un mascota por brinda compaño na un persona cu ta biba su so of na e grandinan cu no tin un interaccion social adecua cu otro persona. Ora bo tin un mascota, e por disminui bo depresion, stress y ansiedad. Pa mehora bo salud, e por disminui bo presion di sanger, mehora bo inmunidad y te hasta disminui bo riesgo di un ataca di curason of di cerebro y e por yuda combati cancer. Claro cu bo mester tene cuenta cu ora bo tin un mascota, esaki ta trece cune e responsabilidad pa e haya atencion medico, cuminda y tempo pa bo pasa cune. Pues, si bo kier tin hopi beneficio y bo ta dispuesto pa tuma tur responsabilidad, kisas bo mester pensa pa busca un bunita mascota.
E stampia di 90 cen ta ilustra dos pushi ta hunga cu un bala di hilo saca for di un macutu.
E stampia di 100 cen ta ilustra un mucha muhe para banda di su cacho.
E stampia di 130 cen ta ilustra un hoben kende ta tene su coneu den su brasa.
E stampia di 135 cen ta ilustra con un mucha homber ta mira su piscanan ta landa den acuario.
E stampia di 220 cen ta ilustra un turtuga jong ora ta dun’e cuminda.
E stampia di 500 cen ta ilustra algun parha inseparabel cu ta comunica cu otro den nan haula.
E serie di stampia ta obtenibel na e diferente oficinanan di Post Aruba, respectivamente na Oranjestad, San Nicolas y Sta. Cruz.
Pa mas informacion tocante e “Stampianan di Fauna 2018” por tuma contacto cu Departamento Filatelico di Post Aruba N.V., cu ta situa na J.E. Irausquinplein 9, Oranjestad, cu su number di telefon 528-7678, of bishita su pagina di Facebook: Aruba Stamps y Webpage: postaruba.com.
E bunita serie aki no por falta den bo coleccion. Busca esun di bo awe mes, ya cu e cantidad ta limita.
