Minister Plenipotenciario Guillfred Besaril a ricibi na Cas di Aruba sra. Brenda Jacobs pa personalmente dune e reconocimento como un gran Arubano. Brenda Jacobs a bira conoci na momento cu sin cu e tabata sa a aparece den e programa di television di SBS6 “Mensenkennis”.
Den e programa – cu camara scondi – tabata tin un bagamundo cu tabata pidi hendenan den caya algo di come. Tur hende den e programa no a worry pa duna e homber di come. Brenda cu tabata candando den e caya ey, a responde positivo riba e peticion di e homber y mientras cu e camara ta registra, Brenda a drenta e snackbar y a cumpra un pan y un coi bebe pa e homber.
Asina e video despues a cuminsa circula via social media y Brenda a ricibi hopi reaccion positivo.
Ta e accion aki cu a yega na atencion di minister Besaril pa asina invita Brenda Jacobs pa bin Arubahuis y den presencia di e personal di Arubahuis duna Brenda Jacobs e elogio cu e merece. ‘Loke bo a haci ta parti di nos custumber. Si un prohimo pidi algo di come nos ta dune di come. Esaki ta e cordialidad cu nos tin como Arubano. Den nomber di Gobierno di Aruba mi ta haci entrega di un plakkaat special pa bisabo cu bo ta personifica e sentimento di nos himno nacional: “Grandesa di bo pueblo ta su gran cordialidad.” Brenda bo ta un gran embahadora di Aruba y bo pais ta orguyoso di e persona cu bo ta!,’ asina sr. Besaril a bisa.
E mandatario a bisa tambe cu esaki ta parti di su vision na Hulanda. ‘Mi a bin ta eherce e funcion di Minister Plenipotenciario cu un agenda politico. Pero banda di esaki mi a bin pa Arubahuis como organisacion. Pesey diabierna ultimo nos a para keto pa prome biaha na e hecho cu e aña aki ta haci 35 aña cu Aruba tin un representacion na Hulanda. Y tambe mi tey pa e comunidad Arubano na Hulanda pa ilustra e contribucion positivo cu e comunidad ta haci aki na Madre Patria. Y e encuentro awe na Aruba ta mustra di esaki.’
Brenda Jacobs cu a wordo acompaña pa su yui homber y su partner a gradici minister Besaril masha hopi mes pa e plakkaat y e rec. ‘Esaki ta con nos a lanta como Arubano. No ta bai pa e reconocimento, pero pa loke bo ta haci pa un otro ser humano cu ta den nesesidad,’ segun palabranan di Brenda Jacobs.
