Riba pregunta di 24ora.com, Minister di Asunto Economico, Comunicacion y Desaroyo Sostenibel, Geoffrey Wever a sigura cu, por lo pronto, CAft no lo cambia su postura pa permiti Aruba un espacio caminda por duna algun tipo di alivio financiero na e ciudadano.
Durante un conferencia di prensa ofreci diamars mainta na sede di gobierno, e mandatario a descarta e posibilidad di estimulo fiscal pa medio di un reduccion den loonbelasting of otro impuesto. “Mi ta referi bek na locual a sosode cu e reduccion di loonbelasting den pandemia, cu te awe CFT no ta di acuerdo cu e reduccion ey, a pesar cu e introduccion tabata pa mehora e poder di compra pa hendenan y pa tin tiki mas placa pa por gasta local,” asina Minister Wever a declara.
E titular di asunto economico ta considera tipo di incentivo asina como herment cu paisnan sa tuma ora bo tin e espacio financiero pa haci esey, pero ta bon conoci cu CAft ta di opinion cu esey no ta un decision prudente. Pa e motibo ey, continuamente ta pidi gobierno pa revoca e decision of busca otro manera pa compensa e 15 miyon florin di perdida di entrada di Pais Aruba.
