Polis ta calcula cu por lo menos 50 persona a fayece den e tiroteo registra den e anochi di diadomingo durante un concierto na Las Vegas.
“Nos ta calculando por lo menos 50 morto y 400 herido,” sheriff Joseph Lombardo a bisa dialuna, durante e prome oranan, cu a identifica e atacante – morto durante e hecho – como Stephen Paddock.
E autor di e matansa a cuminsa tira contra un multitud cu a asisti na un festival di musica den e ciudad Mericano. El a tira for di piso 32 di hotel Mandalay Bay, ubica den e centrico avenida Strip, unda cu tabata celebra e di tres y ultimo anochi di un festival di musica country.
E hecho a sosode despues di 10’or di anochi ora local. E cantante Jason Aldean, kende a logra scapa, tabata riba escenario ora cu por a scucha e prome rafaganan di disparo. Despues di algun seconde, e música a stop, segun un video divulga riba rednan social.
Den e video por a scucha un muhe bisa “abao, mantene bo mes abao”, husto despues cu e musica a stop y un clima total di confusion a podera di e luha. Algun 46 seconde despues, e tironan a cuminsa bek.
Lombardo a indica cu polis a mata e atacante, kende ta pensa cu ta un residente di e ciudad, den e camber di hotel y cu ta busca un muhe cu tabata compañe pa interog’e.
“Nos tin dos polis cu ta na hospital, un di nan den estado critico, e otro cu heridanan menor,” el a añadi. Na Mei, un atentado cu un bom na salida di un concierto di Ariana Grande na Manchester, Reino Uni, a laga 22 morto y 116 herido.
Vuurwerk
Varios persona na prome instante a pensa cu tabata trata di vuurwerk. Damon Leach tabata un di nan. El a bisa na e cadena CNN cu e disparonan a dura “bastante tempo.” “Nos a sconde tras di e barinan di sushi, di algo, cada biaha cu nos tabata scucha un disparo, nos tabata refugia.”
Otro muhe, identifica solamente como Christie, a bisa na e cadena KLAS cu ora scucha e disparonan, el a core cu su casa pa nan auto. Ora nan a yega, nan a haya un homber herida. “Bo por yudami?” el a bisami.” Mi a hib’e hospital hunto cu otro afectadonan.
“E anochi aki ta bay mas leu di lo horibel. Ainda mi no sa kico pa bisa, mi kier a laga mundo sa cu mi ekipo y ami ta sigur. Mi oracionnan ta bay pa esnan afecta awe. Mi curason ta dolor cu esaki por a pasa cu un hende cu tabata aki pa pasa un anochi leuk,” Aldean a skirbi riba Instagram.
Polis a cera bon parti di Las Vegas Strip, e caya unda cu e principal hotel y casinonan ta ubica y a pidi e peatonnan pa no bisa nada riba rednan social e posicion di e agentenan desplega.
E aeropuerto a informa cu varios vuelo a wordo desvia door di e incidente. “Ta un anochi tristo pa Las Vegas,” e alcaldía a skirbi riba Twitter.
E tiroteo a registra shete luna despues cu otro cu a laga un morto y un herido atras y riba e mesun caya Las Vegas Strip. E site Gun Violence ta registra un estadistica di 272 tiroteo masivo, pa loke ta e aña. Sin conta esaki acerca.
