Diadomingo ultimo Voluptuous Models a tene su poolparty yama Voluptuous Pool Party Goes Flamingo, cu a tuma luga na Parke Arawa, caminda cu tabata tin entre otro show di moda y algun actividad mas, specialmente pa e damanan di curva.
Organisador di e evento, Karena Maduro, a splica cu a dicidi pa celebra e hende muhe di curva cu un tremendo pool party. Motibo di esaki ta pa encurasha e hende muhe plus size pa siña stima su mes, embrace su mes manera cu e ta.
Esaki ta un pelea contra body shaming, contra bullying. A scoge e poolparty pasobra cu como hende muhenan plus size, un di e miedonan mas grandi, ta e parti di trahe di baño. Den futuro lo bay tin hopi mas evento unda cu ta bay empodera e hende muhe plus size di Aruba.
Maduro ta gradici Playa Liquor, cu a kere den e evento 100%. Tambe Lindy’s Lifestyle, cu su show di moda. I&U Boutique, Poshly Boutique, y tambe Gorgeous You, cu ta sostene e movemento 100%.
Nan tin un pagina di Facebook, cual ta un grupo cera. E ta un support Group cu mas of menos 2300 muhe den dje. Ta comparti topiconan importante pa loke ta trata e hende muhe plus size di Aruba.
Tambe tin Viva Voluptuous Aruba Models, cu si bo ta un persona cu kier forma parti di e mundo di modelahe plus size na Aruba, por tuma contacto cu nan.
Tambe nan tin Viva Voluptuous Extravaganza, cu lo ta un evento basta grandi y tambe Miss Viva Voluptuous.
Maduro a enfatisa cu ainda tin hende cu tin e miedo. Loke cu nan ta bezig awor aki, mirando cu tin 2300 hende muhe y e grupo ta sigui crece, ta kere cu algun luna, poco poco mas hende muhe lo sinti nan mes tiki mas comodo, di ken nan ta.
