Riba e di dos dia di InterExpo 2022 tumando luga na Den Haag, Hulanda, e isla di St. Eustatius tabata representa pa miembro di Eilandsraad, Clyde van Putten. Den su presentacion, e politico a trece dilanti un di e argumentonan mas controversial di e dia. Fuertemente el bisa cu e constitucion di reino Hulandes ta ilegal y ta bay contra e articulonan di incorporacion di Nacionnan Uni cu Hulanda a firma na 1940. Van Putten ta boga, entre otro, pa henter Caribe Hulandes redefini e constitucion y studia e posibilidad di un structura tipo Commonwealth manera esun di Gran Bretaña.
“Loke mi ta bisando ta cu, e statuut, manera nos conoce awendia, ta ilegal,” e politico a bisa. “P’esey, loke nos ta haciendo awe ta declarando cu nos ta bou di un sistema cu no ta cumpli cu e rekisitonan di Nacionnan Uni.”
Van Putten ta tuma e momentum crea door di varios parlamentario Hulandes cu ta pidiendo Gabinete Rutte IV pa revisa statuut. “Mi no ta bisando cu nos no mester coopera cu Hulanda, pero mi ta kere cu e mester ta riba un manera nobo,” e politico a bisa. “Nos mester wak den e direccion di Commonwealth.”
Nos ta aki na Hulanda, basicamente lastrando pa convence gobierno. P’esey mi ta bisa cu democracia no ta un condicion, pero un derecho fundamental. E ta un derecho humano y p’esey mi ta kere cu e structura di reino Hulandes ta un fayo, un farsa,” asina van Putten a declara.
Na su opinion, e ta ripara cu algun isla ta mustra di tin miedo di nan propio abilidad y ora ta scucha e palabra di otro tipo di gobierno, nan no kier tende, aunke nan ta wordo maltrata. Nan no ta trata cu respeto y dignidad. Tin un diferencia grandi den termino di igualdad y ora cu ta trata pueblo di Caribe Hulandes versus esun di e parti Europeo di reino, e ta kere cu e calidad mester ta igual tur caminda y no mester tin ningun forma di discriminacion.
