Despues di un walk-out na Warda di Polis Oranjestad, a forsa un reunion urgente cu Mando Policial cu awor ta encabesa pa Comisario Vanessa Tjon. Alto Inspector Molina no tabata presente den e reunion pa representa su districto pero su reemplasante a enfoca riba e retonan cu e Polisnan ta confrontando, den presencia di Sindicato di Polis Aruba (SPA). Na final partidonan a haya otro y trabou ta continua normal atrobe.
E keho principal ta cu Polisnan kier bisti un otro uniform, uno mas informal den e dianan aki. Tambe nan kier cera porta di dilanti pa evita cu publico ta drenta paden. Sinembargo, Mando Policial a convence nan cu uniform nobo, den forma di poloshirt ta rumbo pa Aruba caba mientras cu lo percura pa desinfecta e glas pa publico cu frecuencia, pa evita contagio.
Comisario Vanessa Tjon a subraya su satisfaccion pa e trabou duro cu tur Polis ta eherciendo e ultimo simannan aki, pa oranan largo y bou circunstancianan no normal.
