Awe tardi pa 5:05pm un biaha mas polis a bay atende cu un homber problematico den Playa. A deten’e dos biaha caba e siman aki. Den Caya Betico Croes y dilanti Manuelito’s Bar den Hendrikstraat. Ambos biaha a deten’e pa su comportacion, sea e tabata tira su curpa riba auto of ta spanta hende cu arma blanco of piedra den man.
Awe el a bolbe haya atencion di polis na altura di CITGO Boulevard. Un ciudadano atento a conta cu e tabatin un piedra den su man y tabata actua hopi sospechoso. No a confia su movecion y a bati alarma mesora na polis. Parce cu e homber aki tin mester di un yudansa psikiatrico avansa. Pesey a pone slachtofferhulp na altura di e caso aki.
Ta spera cu pronto e homber aki haya ayudo profesional. A deten’e pa di tres biaha e siman aki y a transport’e pa ward’i polis caminda e lo haya un cel pa sosega su curpa pa por lo menos ocho ora. Obviamente cu esey no ta un solucion y si sigui asina, como cu su problemanan ta conoci, cu Fiscal lo no duna ordo pa encarcel’e mas tampoco. Ta momento pa e entidadnan responsabel, pa tuma e caso aki over y garantisa cu e pashent por haya e ayudo y cuido necesario y asina evita molester na comunidad.
