Dialuna despues di 10:30 pm a dirigi patruya di Polis pa un cas situa den Mandolinstraat na Dakota pa un problema entre dos famia. Como cu nan no por a sali for di e discusion, a opta pa yama polis pa haci e trabou di hues den e disputa di bisiña.
Dos patruya di polis a yega na e adres menciona y despues di a scucha ambos partido, a cuminsa intermedia pa mira si por planta un simia di paz entre e dos famianan cu tur tempo a biba bon band’i otro pero cu tempo e relacion a daña. E defensornan di ley a splica ambos cu mester biba bon cu otro, cu bida ta cortico pa ta den guera cu otro y cu paz semper ta miho cu guera.
E polisnan a keda un bon rato ta papia cu ambos partido, pero ta parce cu nan no por a yega na otro. Despues di por lo menos mey ora, e situacion a calma y polis a sinti cu tabata OK pa bandona e sitio y sperando cu tempo lo cura e heridanan.
