Diasabra autoridadnan Hulandes a detene un homber cu tabata tin cuater hende rehen den un nightclub pa varios ora largo, treciendo un final pasivo na un situacion bastante tenso.
Autoridadnan no a comparti ningun detaye di e victimanan, fuera cu nan tabata empleado di e luga, pero si a laga sa cu e agresor den e caso aki ta un homber di nacionalidad Hulandes.
No tabata tin ningun mencion riba motibo di e incidente, pero autoridadnan ta bisa cu no ta kere e tabata un acto di terorismo. Polis ta bisa cu e homber deteni tabata arma cu cuchiu, hunto cu un tas cual mester a keda examina pa establece si tabata contene explosivo.
E incidente a tuma luga den e ciudad central di Ede, 85 kilometer pazuid di Amsterdam, un luga cu yama Cafe Petticoat. Autoridadnan tabata negosha pa oranan largo te na momento cu finalmente a logra haya e persona sali pafo di e luga y bay riba rudia cu su man na cabes pa keda deteni.
E homber ta un conoci di polis y tin acusacionnan haci caba den pasado na su contra pa comportacion menasante. Fuera di esaki autoridadnan no a suministra mas informacion pidiendo pa privacidad y pa laga e investigacion cana su caminda.
Esaki a causa un locura total den e area aki na Hulanda caminda cu a pidi hasta pa evacua alomenos 150 cas y trein no tabata mag di stop na e stacion di e comunidad aki. Un susto grandi cu hopi a pensa lo tabata un tipo di atake of acto di terorismo riba nan pais.
