E luna aki Poder di Hubentud ta presenta su proyecto pa 2022, caminda cu varios hoben ta presenta cu nan propio trabao despues di un periodo cu a cuminsa dia 12 di augustus ultimo, cu nominacion dje hobennan, p’asina mira cua t’esunnan cu a destaca na Aruba den e diferente categorianan y p’asina selecta cua lo forma parti dje proyecto Poder di Hubentud.
E hobennan a pasa den un trayecto di tur diasabra cu diferente tayer pa siña con pa traha un proyecto, segun lider di Proyecto Poder di Hubentud, Vanessa Croes.
Elaijah Marsdin ta un nominado di Poder di Hubentud y a conta cu e biaha aki e, como un di e miembronan di board cu su team excelente lo organisa un tayer cu yama ‘A toolkit for a selfbuild’. E tayer aki ta consisti di cuater curso, manera ‘laundry, cushinamento, con pa traha riba presupuesto y tambe housekeeping.’
Marsdin ta sigui conta lo tin profesional di cada categoria cu lo bin duna un man, pero ta spera cu nan mes lo siña di esaki.
Ta prome biaha cu ta organisa un actividad asina aki como grupo, aunke cu Poder di Hubentud tin esaki pa di ocho aña. E tayer aki lo ta completamente gratis y lo tuma luga dia 19 di november 2022 riba un diasabra y lo ta na Sonrisa Aruba, fo’i 10:00 am pa 4:00 pm.
Lo bay tin un categoria di mucha di 13 pa 15 aña y esaki ta mucha cu ta bay scol of tambe cu ta den opleiding pa bay studia afo.
Pa mas informacion por tuma contacto cu nan riba e pagina di Facebook di Poder di Hubentud, unda cu lo divulga mas informacion riba e tayer den e simannan cu ta bin. Tambe lo tin un registro unda cu por inscribi p’e evento aki.
Pa mas detaye lesa TREMPAN.
