Diasabra venidero, 25 di november, Limpi Limpi su Baki Den Bario lo ta na Playa Pabao, y tabata tin un charla organisa den conexion cu esaki. E charla aki a tuma luga diaranson na Centro di Bario Playa Pabao pa asina brinda splicacion amplio tambe riba maneho di desperdicio riba nos isla.
Durante e charla a duna comunidad oportunidad pa dialoga y haci pregunta tocante baki den bario. A comparti datos tambe na tur presente durante e anochi di charla informativo aki. Ciudadanonan a trece algun sugerencia dilanti tambe na unda por bin adaptacion pa haci e actividad di baki den bario uno mas suave.
“Nos tin un total di shete baki den bario caba cu nos a organisa. Cada un di nan ta bin cu datos adicional caminda cu nos ta adapta, pa garantisa cu fluho di auto ta bay hopi mas lihe.”
Minister Arends ta comenta cu nan a cuminsa cu e prome baki den bario cu un total di cinco desperdicio, y awor ja caba na ocho tipo di desperdicio cu ta colecta separadamente pa procesa nan den forma responsabel.
BAKI DEN BARIO TA UN COMIENSO
Cada bario tin su propio preocupacion of situacion mas specifico, no ta tur bario of districto ta enfrenta e mesun tipo di obstaculo of reto. Minister Arends ta bisa nos cu loke nan ta compronde for di e ciudadanonan ta cu hopi biaha nan bario ta bin dilanti pa aspecto kisas negativo. Pasobra ta haya tur tipo di desperdicio tira rond, den naturalesa y rond e area.
Nan ta puntra con gobierno por yuda soluciona esaki. “Mi ta kere cu e actividad di baki den bario ta un comienso.” Minister Arends ta bisa cu nan ta scucha for di comunidad tambe cu tin ora nan tin forma pa paga hende pa colecta e desperdicio, y akinan e departamentonan di gobierno hunto cu otro companianan a bisa di lo ta dispuesto pa duna un man.
A nota tambe cu FCCA mes a cuminsa colecta desperdicio for di e habitantenan di e barionan di casnan bao FCCA pa trece nan den actividadnan di baki den bario. Esaki ta un responsabilidad comparti, segun ministerio di naturalesa ta enfatisa. Mas y mas instancia ta yudando pa asina por mantene Aruba limpi.
PREOCUPACION DEN TURISMO PA SUSHEDAD
AHATA (Aruba Hotel & Tourism Association) a recientemente trece dilanti tambe nan preocupacion riba aumento di sushedad. Nan ta sinti cu e turistanan ta kehando cada bes tambe, cu hopi mas señal biniendo for di sector di turismo cu parce Aruba ta birando hopi mas sushi. Nos a puntra e mandatario riba esaki cual e ta bisa nos cu e ta un preocupacion di tur hende, y no ta algo cu a cuminsa awor. “Departamento di gobierno y sigur Bureau City Inspector ta haciendo un tremendo trabao.
Diariamente boso mes como 24ora ta highlight e trabao cu nan ta haciendo den areanan habita mas den centro di e isla mes, pero tambe den area hotelero.” Bureau City Inspector ultimo tempo berdaderamente a bin ta haci nan esfuerso pa Mantene varios area limpi rond di nos isla. Unda cu tin desperdicio, ta percura pa un ploeg bin aloca esaki di biaha.
Minister Arends: “Dus mi ta kere cu tin un adelanto grandi na con ta anda cu desperdicio. Nos ta consciente tambe cu no ta tur hende ta cambia di perspectiva of adapta di biaha, semper tin un 10 pa 20 porciento cu mester educa y informa continuamente pa asina nan tambe por haci e transformacion y yega na unda nos kier yega.”
