Plataforma Aruba ta necesario pa asina ciudadanonan conoce kico ta arte contemporaneo

Osaira Muyale no ta un persona desconoci den comunidad. E ta un artista cu a yega di expone varios obra y awo, un biaha mas, el a bin cu un obra yama “Dia mi topabo bek, mi tin un flor riba mi cabes.”

E obra aki ta di 2004 y ta di un instalacion di e tempo cu Muyale tabata traha obranan den e color cora. E ta bay over di e proyecto yama Surrounded by Circles. Muyale ta conta cu constantemente e tabata cana den e mesun circulo. E tabata tin e prome galeria di arte contemporaneo for di 1994 te cu 2002. Tempo cu el a cera, el a haya un burnout. P’e e color cora tabata mas bien no algo di amor. E tabata contrario. E tabata tin hopi cansancio. E tabata mas bien representa rabia. E tabata kier a bay bek den un silencio. P’esey el a bay su cas bek y duna su mes e posibilidad di bay bek den su mes y ta mas trankil, y cuminsa asina di nobo. E ora el a habri su galeria den su propio cas.

Plataforma Aruba

Osaira Muyale ta sigui conta cu e ta hopi contento di ta forma parti di e fundacion. E Plataforma ta algo cu nan a traha hopi bon hunto. Ana Maria Hernandez, ta e fundado y hunto cu un otro miembro, esta Angelo Tromp, a invita Muyale. E plataforma aki kier traha cu e hobennan. Muyale ta contento pasobra tin movecion atrobe. Esey ta e parti di e circulo, cu tin movecion atrobe. Ta sali for di un circulo, cuminsa den un otro circulo. “Awo ban spera cu pronto por wak hopi mas espacio cu ta habri cu Arte Contemporaneo, Arte Moderno. Y pa nan sigui. Arte ta hopi importante, cultura ta hopi importante, pasobra e ta cura. Ora cu bo ta haci un trabao, esaki ta un modo di comunica. E ta trece un combersacion y ta depende kico e persona ta papia y bo por papia di dje. Bo ta bay paden di bo mes. Bo ta duna bo alma cuminda, door di combersa riba temanan real, temanan di awe. Esey ta contemporaneo. Temanan di awe, kico ta pasando awe den mundo, kico ta pasando awe na Aruba. Nos tin rabia ainda? Nos ta cora ainda? Tin hende ta wak’e como un amor, pero tin otro hende ta wak’e den un otro forma. Bo ta trece comunicacion den un forma nechi. Bo no tin cu rabia, ni zundra, sino ta un lenguahe cu tur hende por papia riba realidad,” Muyala a splica.

E artistanan

Zoe Velvet Ramos tin 31 aña di edad y e ta un di e artistanan cu a expone su obra, cu tin como titulo “Eat for the Poor”, traha na 2011, como parti di su show di graduacion. Pero tambe door di otro eventonan cu a envolvi of a uza cucharanan.  Awo Ramos a trece esaki den un otro version, caminda cu tin un comchi traha di pan of buscuchi. Idea ta pa personanan ta bin y coy un pida di e pan y “Eat for the Poor”, esta come pa esnan cu no tin. Na Africa ta bisa cu no tin sentido y ta ponebo pensa con bo por relaciona bo mes cu esnan cu ta den un trauma of den un situacion dificil y humanamente ta compronde un cu otro.

Ta un accion, caminda cu bo ta tuma parti di e idea absurdo cu bo por come pa hende pober. Tambe den dje bo ta haya napkins cu mensahe skirbi. Den cada cuchara tambe tin un lyric of un recordatorio, di un hende su experiencia. Hende por lesa den e cuchara cu tambe ta bisa cu tin cu pensa riba otro prome cu bo mes come.

Un bon iniciativa

Ramos a comenta cu e iniciativa di Plataforma Aruba ta necesario, pasobra e ta duna chens pa hende conoce kico ta arte contemporaneo, ki artista tin na Aruba y Caribe. Arte Contemporaneo ta di awo y e ta un expresion di awo.

Irvin Aguilar ta un otro artista cu a expone su obra. E obra ta un instalacion cu ta haci atrabes di printmaking. E ta manera e tamaño di un superficie. Por ta palo etc. Aguilar ta trahando esaki, pasobra e ta cuestiona su mes pakico e tin cu imprimi hopi biaha un solo imagen. Door di esey e ta purbando di haci un only plate. P’e ta importante reflexiona, pasobra e titulo di e obra ta “The empty chair”. E ta un metodologia di psicologia. Ta para riba un stoel bashi, bo ta expresa, por ta papia cun’e pa basha bo sentimento of loke sea cu bo tin paden. Esey ta locual cu Aguilar kier a expresa atrabes di e obra. Ta e expresion atrabes di e piesa cu ta imprimi of cu tin ink riba dje. E otro ta bashi. Esey ta e expresion y esey ta e aspecto bashi cu por ta e persona, si e ta basha su feelings of su pensamento. Aguilar ta purbando di introduci esaki y pa e publico por compronde e manera di pensamento of expresion.

“Kico bo ta wak?”

Arte visual contemporaneo ta nace for di e comunicacion entre un obra y su audiencia. E preguntanan cu esun cu ta wak ta haci su mes ta un parti importante di e comunicacion. Esaki ta e enfoke di e evento Kico bo ta Wak? 

Esey ta e evento cu a tuma luga diaranson dia 18 di september na Biblioteca Nacional, caminda cu den e anochi interactivo aki, Plataforma Aruba a crea un espacio unda e audiencia por a descubri maneranan nobo di experencia arte visual contemporaneo cu nos artistanan local cu a comparti nan obra y vision di arte.

Arte Contemporaneo den Biblioteca ta un colaboracion cu Biblioteca Nacional Aruba cu ta brinda e comunidad Arubano un coleccion di publicacion relevante tocante arte visual contemporaneo. E proyecto ta acompaña pa un serie di evento den Biblioteca Nacional Nacional (Oranjestad) cu a toca temanan di e publicacionnan den e coleccion. 

E programa publico di Arte den Biblioteca ta wordo realisa cu e sosten di UNOCA.