Edwin Dania propietario di boto Teresa, despues di a confronta problema riba lama, a conta kico realmente a tuma luga y dicon mester a haya yudansa di wardacosta pa regresa tera.
Diasabra mainta a ricibi informacion cu polis maritimo mester a sali pa rescata un boto den problema 4 miya zuid di Aruba. Den careda di 10.45 am a drenta yamada via central di polis cu un boto cu nomber Teresa a haya problema cu motor. A bin topa cu e boto cu nomber Teresa y matricula A-2551 cu 2 tripulante abordo ta drif y a logra touw esaki trece Aruba.
Edwin a conta, cu manera semper nan ta pisca henter anochi y mainta ora dia habri nan ta coy rumbo pa Aruba bek. Pa nan sorpresa, algun miya riba lama, e boto a shutdown completo riba nan. A cuminsa analisa kico lo por ta e problema aunke Dania tabata sigur cu e tabatin tur cos up to date.
A calcula cu esaki lo a sosode aproximadamente 9:00 am y no por a constata kico lo por a bay robes cu e motor na e momento ey. A purba start pero bateria a muri. No a keda nada otro cu haci uzo di e opcion di number di emergencia, cu ta 139 wardacosta di Corsou pa asina bati alarma.
Piscado Edwin Dania a expresa su gratitud pa e trato cu nan a ricibi tanto di e miembronan di wardacosta di Corsou como di maritieme politie di Aruba. Pa su sorpresa locual cu a pasa cu nan riba lama, ta cu gasolin a caba cu nan. Segun Dania ta algo imposibel como cu semper tin dos tanki ta yen y cada tanki ‘purun’ ta hiba 190 florin di gasolin aden. Segun su calculacion e tabatin suficiente gasolin pa bin bek aden sin problema.
Pa su sorpresa ora di controla e tankinan, a bin haya nan completamente bashi. Den su bista esaki ta un acto di ladronicia cu a tuma luga y sigur un mal echo, caminda un hende a bin saca gasolin/ horta gasolin y pone nan bida na peliger riba lama. Como piscado bo ta confia e calculacion cu bo tin di semper y no ta premira cu ta bin un hende ta haci un mal echo asina ey y laga bo sin gasolin.
E ta un acto di mal echo como cu algo hopi mas pio lo por a pasa y cu nan por a perde nan bida riba lama, confiando cu tin gasolin pa despues bin resulta cu a horta esaki y laga nan sin nada. Dania ta duna un conseho na demas piscado, doño di boto, capitan di boto pa controla purun prome cu sali. No haci cos di confia, cu ta locual Edwin a haci, di no controla prome cu subi lama. Haci un control riguroso, sigura cu bo gasolin ta na ordo pa no keda na mita caminda riba lama grandi of no regresa nunca mas.
