Barracudas Aruba ta invita mucha muhe y mucha homber nan entre 6 – 10 aña pa bin sera conoce cu e deporte di landamento artistico. E ultimo dia pa try-out ta diasabra 25 di augustus 10:00am na piscina olimpico Roly Bislik na Savaneta.
E deporte di landamento artistico di Aruba ta destacando riba nivel internacional y esey ta danki na un coaching staff dedica y capacita pa saca e mihor di nos atletanan. “Atletanan ta drenta nos deporte cu cierto aptitud, y no tur mucha tin mesun talento, pero nos ta purba sembra un actitud di perseverancia y ethica di trabou cu ta duna nan e confiansa y abilidad di ta exitoso den e deporte y den bida.” Esaki coach Yami ta comparti.
Un atleta di landamento artistico tin e curason di un landador, un curason fuerte y grandi pa pusha bai pa dilanti. Tambe tin e alma di un bailarin cual ta inspira y conmove e publico cu su actuacion y expresion di cada rutina. Ta train tur siman,varios biaha pa siman pa logra metanan proponi ariba cada nivel y categoria. Nos atletanan ta train duro pa por representa nan team, nan club, nan bandera pero tambe nan mes cu cada competencia local of internacional.
Mas cu claro ta eherce e plan di training na un manera cu e atletanan ta disfruta di e training apesar di e intensidad. Pa inicia e temporada di 2018/2019 e famia di barracudas a tene un family day pa atletanan y nan famia. Despues di a subi hooiberg mainta, mayornan a bai pisina pa asina “purba” landamento artistico hunto cu nan yuinan y a haña un idea kiko ta synchro en berdad. Mama, tata, rumananan y e atletanan a disfruta di un mainta hopi ameno.
Si bo yui(nan) of cualkier familiar entre 6 -10 aña ta desea di forma parti di e famia di barracudas, boso ta keda cordialmente invita pa e try-out diasabra 25 augustus 10:00am na pisina olimipico Roly Bislik na Savaneta.
Ken nos ta?
Barracudas Aruba desde 1974 a introduci e comunidad di Aruba na e bunita deporte di natacion sincronisa cu e meta principal pa brinda atletanan oportunidadnan pa desaroya y prepara nan mes den e deporte pa competencianan international. Pa mas informacion por bishita nos riba Facebook @barracudas.aruba, Instagram Synchro Aruba of Website: www.barracudasaruba.com
