Despues cu COVID a haci su entrada riba nos isla, Aruba a hay’e ta bati na porta di Hulanda pa un financiamento pa asina sigui cumpli cu su obligacionnan financiero.
Tres aña despues, a yega ora pa paga e lening aki y Aruba lo a desea di paga na un interes mucho mas abou, pero esaki lo a nifica di firma un Rijkswet y LAft, cual Gobierno di Aruba no a bay di acuerdo cu ne. E ora Hulanda su contra-oferta, cual tabata e ultimo, tabata pa paga e fiansa na un interes di 6.9%.
Prof. mr. Peter Nicolaï, Miembro di Eerste Kamer pa PvdD (Partij voor de Dieren), a splica cu Aruba ta wordo castiga den sentido cu nan lo mester paga dobel interes. Gobierno di Hulanda a bisa Aruba cu nan lo por ofrec’e e 3% solamente di e ta dispuesto pa bay di acuerdo c’un Rijkswet cu lo bin c’un supervision financiero.
Segun Nicolaï, Aruba no ta cualkier pais na cual ta otorga un financiamento, pero un pais ruman, cual lo mester yuda, caminda cu aki ta trata di un lening durante COVID . Pero n’e momentonan aki, Aruba no por paga e prestamo bek, pero en bes cu Hulanda yuda Aruba, e ta bin cu exigencianan pa haci cambio den su propio legislacion. Cambio den cual Aruba lo mester acepta cu ta mina su propio autonomia cual nan tin derecho riba dje segun Statuut.
Aruba tin su propio ley riba supervision financiero (LAft). Un ley cu toch ta basta amplio, ya cu e pais autonomo Aruba ta duna Hulanda toch basta poder. Segun e acuerdo, Gobierno di Reino por nombra un presidente y tambe un miembro, cual lo duna Hulanda hopi mas poder riba Aruba. E influencia di Hulanda ta bay ta mucho mas grandi door cu e lo por nombra dos di e tres miembronan den e CAft (College Aruba Financieel Toezicht).
