Den careda di 2.30 di merdia vehiculonan di polis for di tur skina di Aruba pa sede di Guarda Nos Costa unda personanan deteni un biaha mas a dicidi di laga nan bos di mal contento resona.
Manera ta conoci, esnan cu ta cuida e personanan deteni pa ta ilegal na Aruba ta personal di CEA. Den caso cu surgi lantamento, manera awe, mester yama Polis. Na yegada por a scucha hopi persona ta grita cu e trato eyden ta hopi malo. Asina por ehempel ta menciona cu mester comparti un corchon.
Na Guarda Nos Costa no tin solamente personanan deteni na Aruba pasobra nan ta kedando ilegal, pero tambe stranheronan cu a caba di sinta un castigo den KIA pero cu no por a deporta ainda for di e isla, debi na e situacion di cierre di frontera.
Awe durante e lantamento un total di shete patruya a acudi na e sitio pa reestablece ordo na e sitio. Na final a transporta cuater persona den dos diferente auto pa otro sitio di detencion.
Hefe di Guarda Nos Costa Truyd Hassell a sali pafo pa entrega Polisnan un documento pero no tabata kier a duna comentario riba e sucedido.
