Julius L. Penha & Sons Aruba N.V. (Penha), un compania cu ta forma parti di e famia di Penha Duty Free (Penha Group) estableci na 1865, aki na Aruba operando ya caba desde 1971 cu su tiendanan Penha Duty Free, y recientemente tambe Victoria’s Secret, MAC y Bath & Body Works Aruba, a tuma nota di cierto expresionnan haci pa algun empleado (6) di su operacion.
No ta custumber pa reacciona publicamente ariba asuntonan di compania pero den e caso specifico aki a dicidi di haci un excepcion mirando e contenido di dicho expresionnan. No ta un secreto cu economia di Aruba ya pa un tempo (añas) a bin ta deteriora. Benta a baha mientras cu e gastonan operacional a sigui subi drasticamente cu tur e consecuencianan negativo cu esaki ta trece cu ne.
E crisis actual cu desde maart a bin ta asota Aruba y mundo henter, a simplemente empeora e situacion. Covid-19 a acelera e deterioracion. Y si sigui e desaroyonan mundial di cerca, por deduci cu e futuro no ta pintando nada positivo tampoco. Esaki ta e realidad duro cu nos ta enfrentando actualmente como comercio. Companianan cu primordialmente ta depende ariba e industria turistico awor tin’e mas duro cu nunca y practicamente a pasa pa cuido intensivo y diariamente ta bringando pa nan bida. Y esaki no ta un exageracion. E ta un hecho. Ta berdad cu nos frontera dentro di poco lo ta (parcialmente) habriendo y cu nos tur cu tin Aruba na pecho ta cargando e speransa cu (por lo pronto) nan lo keda habri. Pero hecho ta, cu e fluho di turista cu nos ta anticipa di lo ta bishitando nos isla por lo pronto no lo ta na e mesun nivel cu nos a bin ta custumbra cu ne. Aki mester tene na cuenta tambe e posibilidad real cu ta existi cu e turista cu bin Aruba no lo ta gastando mesun hopi placa mas cu antes y lo ta concentrando su mes mas ariba locual cu nos naturalesa tin pa ofrece, por ehempel nos beachnan. Mientrastanto a consecuencia directo di e crisis, localmente e placa no ta lorando tampoco (mas) na un nivel deseabel/necesario. Esnan cu na e momentonan aki ainda tin trabou no tin mesun hopi entrada mas y/of ta pensando dos bes prome cu saca placa. E economia di Aruba poco poco ta stagnando.
Punto ta y ta keda cu benta a disminui substancialmente e delaster añanan y cu tur cos ta mustra cu den e temporada nos dilanti e trend aki lamentablemente no lo bay cambia y lo bira hasta pio. Claro cu semper den temponan dificil mester keda positivo. Sin embargo mester keda realistico tambe. No mester ta dificil pa compronde cu como compania bo ta hayabo tin biaha ta tuma cierto decisionnan/accionnan cu (inicialmente) por ta dificil pa compronde pero cu ta necesario pa por trata di scapa e operacion y asina purba di garantisa trabou y pues entrada di un gran parti di e empleadonan. Empleadonan cu semper nos a cualifica como famia. Mester ta cla cu decisionnan/accionnan asina no ta wordo tuma levemente. Al contrario, ta decisionnan/accionnan cu como compania ta haci hopi dolor pero cu, y nos ta ripiti, ta realmente necesario pa por sobrevivi e crisis actual. Asina como dunado di trabou responsabel y pa salvaguardia mas tanto posibel pues e futuro di nos compania a largo plaso, recientemente a tuma e decision doloroso pa cera nos tres tiendanan na Palm Beach Plaza y tambe nos localidad den centro di ciudad na Plaza Daniel Leo na cual localidad e 6 empleadonan en cuestion ta labora. Mientrastanto a reparti e otro empleadonan entre e localidadnan cu ainda ta habri. Den luna di april den un forma transparente a comunica na tur nos empleadonan e situacion dificil cu compania ta aden y cu no ta sigur ainda kico lo paga e luna ey y cu ta trahando duro ariba esaki. Nos a conseha tur empleado pa nan aplica pa e programa di Gobierno di Aruba, FASE, pa asina nan por haya un ayudo financiero den april. E momentonan ey ainda no tabata cla con exactamente FASE (lo) tabata (bay) funciona pero nos tabata kier pa tur nos empleadonan aplica en caso cu nan por a haya un ayudo financiero di parti Gobierno di Aruba. Despues compania a tuma e decision basa ariba su situacion financiero na e momentonan ey, pa paga su empleadonan den luna di april 50% di nan salario incluso un averahe di nan comision. Tur empleado a wordo informa di e decision aki mediante un carta individual.
Y tur empleado a bay di acuerdo tambe cu esaki. Na ningun momento a wordo comunica cu e cestanan di cuminda cu nos lo a laga trece pa nan tabata pa compensa e 50% di salario cu nan lo no a ricibi. Locual cu a wordo bisa ta cu banda di e 50% cu lo a wordo paga, compania lo proporciona cestanan di cuminda na tur su empleadonan pa di es manera ey apoyanan y nan famia den e temponan dificil aki di crisis. Ta berdad cu e cestanan a tarda un tiki pero esaki tabata pa motibonan logistico cu tabata totalmente fuera di nos control. Importante tambe ta pa nota cu Penha lo sigui brinda e cestanan aki na su empleadonan den e luna nan nos dilanti. Tambe ta berdad cu mayoria di nos empleadonan na final no a ricibi FASE den luna di april pero esaki tabata paso nan entrada den dicho luna (april) tabata mas cu Afl. 950 cu consecuencia cu nan no a cualifica pa e programa (pago) di FASE. Ta importante pa nota cu na ningun momento a kita e 6 empleadonan for di trabou. Claramente ora haci un oferta na un empleado pa acepta un pakete pa termina un relacion di trabou cu entendimento mutuo, no por tin caso di un terminacion. Significativo ta e hecho cu den e caso specifico aki a comunica na e 6 empleadonan cu mientrastanto nan lo keda ricibi nan salario pa luna di juni mirando cu a propone pa termina e relacion di trabou cuminsando 1 di juli. Como bon dunado di trabou a hasta encurasha nan pa tuma contacto mesora cu Departamento di Labor pa asina nan por verifica cu dicho departamento cu locual cu ta ofreciendo nan (e oferta) ta cuadra cu nos leynan laboral. Esaki a wordo comunica telefonicamente (mirando cu e fronteranan tabata cera ainda pa cu entre otro Curaçao) den un yamada den cual a participa e manager encarga cu apoyo di personal, e director di recurso humano di tur nos tiendanan den region incluso Aruba, como tambe e assistant manager local cu tabata fisicamente presente. A duna cada un e oportunidad pa haci cualkier pregunta cu nan por tabata tin y a informa nan tambe cu si despues ainda tin pregunta por a libremente tuma contacto bek pa responde nan.
Penha kier a remarca un rato cu e no ta e prome compania local y lamentablemente no lo ta e ultimo dunado di trabou na Aruba tampoco cu a y lo bay ofrece un pakete na su empleadonan a consecuencia di e crisis. Tambe, cu e programa di subsidio salarial di Gobierno di Aruba no ta prohibi un terminacion mutuo di e contracto laboral. Esaki por lesa claramente den e decreto ministerial di e programa di subsidio. Ta berdad cu e 6 empleadonan a wordo pidi pa recoge nan pertenencianan. Pero esaki mirando e hecho cu nos tienda na Plaza Daniel Leo a cera su portanan pues no ta responsabel pa laga ningun pertenencia personal eyden, pero tambe naturalmente e hecho cu e oferta cu tin ariba mesa ta pa un terminacion mutuo di e relacion di trabou cu efecto 1 di juli. E programa di subsidio salarial ta basa ariba un aporte financiero propio di banda di e dunado di trabou dependiendo di e grado di perdida di entrada di e compania. Si e perdida no ta completo, ainda e dunado di trabou lo mester carga un parti su mes. Esaki ta entre otro locual cu Penha no lo por carga mas si e kier actua di un manera responsabel y cu mira pa futuro planea y purba di tur manera di salvaguardia mas tanto cu ta posibel su operacion ariba e isla di Aruba pa asina na final evita un scenario di bancarota.
Na nos hermana isla Curaçao lamentablemente ya caba mester a kita un 30% di e total di nos empleadonan. Un situacion cu naturalmente nos no lo kier yega na dje aki na Aruba. Como compania serio Penha lo semper sigui actua a base di leynan laboral vigente, bou guia di asesoria legal, e profesionalnan di Departamento di Labor como tambe mediador di Gobierno di Aruba, semper teniendo na cuenta e situacion actual.
Finalmente Penha kier a desea tur hende ariba e pida baranca Aruba, hopi animo, optimismo, forsa y principalmente perseverancia den e temponan dificil cu nos ta pasando aden. Julius L. Penha & Sons Aruba N.V. Gerencia
