Un tin nada mas precioso, ora un mayor ta siña su yiu, pa e pidi Dios tur locual cu e mester den nomber di Cristo Hesus.
Den Mateo Capitulo 7:7 ta para skirbi: Pidi y lo duna na boso, busca y boso lo haya, bati y lo habri pa boso, pasobra ken cu pidi ta ricibi y esun cu busca lo haya y pa esun cu bati lo habri.
Esaki ta regla di oro pa henter nos bida, esaki palabra aki ta haci nos dependiente di Dios.
Pasobra awendia hende ta mas dependiente di material cu di Dios. Muchanan ta kere cu Google sa tur cos y hopi di nos hubentud no tin e conocemento pa yega na porta di Dios.
Y como mayor nos no por culpa e scol cu nan ta bay. Ta fo’i cas nan tin cu haya e guia pa nan sa cu ta cerca Dios tin cu bay prome.
Hasta ora nos yiu acerca nos pa algo, nos tin di siñ’e con pa pone su peticion, den oracion, pa Dios por provee pa asina e por haya locual cu e kier.
Asina nos ta lanta mucha cu confiansa den Dios, asina nos ta maneha pasenshi na mucha, pa nan por compronde cu no ta un automat bida ta, pero tur cos tin un proceso pa bo yega na dje.
Cuanto biaha bo no ta tende cuanto cos un mucha kier. Anto e ta rabia ora abo como mayor no por pone nan directamente riba mesa pe.
Pero si abo como mayor a siñ’e for di chikito, con ta pidi na Dios y con ta warda awor cu e ta grandi lo bo no tin e stress di su peticion.
Mucha kier cierto marca di telefon cu ta hopi caro y caba esun cu e tin ta haci mesun yamada y ta saca mesun potret, pero como amigo (a) tin otro marca e tambe kier mesun cos.
E palabra di Dios ta siña nos, pidi, busca, bati, cerca Dios.
Pidi: Bo ta pidi den nomber di Hesus pasobra Hesus mes a bisa cu tur locual boso pidi mi Tata den Mi nomber e lo duna boso. (Juan 15:7 y 8).
Busca: Tambe ta igual, pasobra bo ta haci un peticion prome na Dios pa locual cu bo tin mester, por ehempel si bo tin mester di un trabao. Inclui Dios den bo solicitud y sali bay busca, pasobra Hesus a bisa; Ma busca prome e Reino di Dios y su Husticia tur e cos nan aki lo añadi na boso (Mateo 6:33).
Bati: Ta recorda nos cu Hesus a bisa: Ami ta E caminda, e berdad y e bida, ningun hende no ta bin cerca e Tata si no ta pa medio di mi. (Juan 14:6)
Ora nos siña nos yiunan esaki nos ta evita cu nan ta cay den brasa di sugardaddy y sugarmommy, nos ta evita cu nan ta cay den man di hende cu mal astucia y cu hopi biaha kier uza e muchanan pa duna nan algo.
Mustrando e muchanan con ta yega cerca Dios tambe lo haci nan menos materialista pa cos.
Cu Dios yuda tur Famia den instruccion di nan yiunan riba e caminda di Dios.
