Negligencia ta nifica flohera, nonchalant, slordig, sin cuenta, sin respet, sin balor, y e ora nos ta trata , hende, articulo y nos hogar cu negligencia, nos lo sufri e consecuencia.
Awendia a bira asina dificil pa coregi un hende, pasobra inmediatamente bo ta topa cu e excuus, bisando no husga mi y esey ta defensa di hopi hende horea duro y curason duro.
Pero Bijbel ta avisa nos esey cu e principio di e mundo aki, cual ta satanas lo tapa horea y wowo di hopi pa nan no tende ni mira e berdad, y asina e por sclavisa hende.
Pa hopi tempo nos a bin ta avisa mayor tocante comportacion di yiu y hasta awor a bira tempo pa nos cuminsa di avisa yiu tocante comportacion di mayor.
Si un mucha ta mira su mayor ta huma marihuana, ta bebe, y si e mayor como tata tin mas muhe cu no ta su mama, y si e mama tin mas homber hunto cu su tata, si nan ta meti den bruheria, paranda, etc., e ehempel nan ey no ta cos di sigui. Aunke e mucha mester respeta su mayor pa su relacion cu Dios ta uno limpi, pa asina e tin bendicion riba su bida.
Pero actualmente tin hopi mayor no ta compronde cu nan comportacion ta hasta daña e relacion di nan yiu cu Dios. Pa motibo di negligencia, tur cos ta sali for di man.
Notabel ta cu cada rato algo pasa, nos ta ripara cu ta muchanan bao di 18 aña ta envolvi den bagamunderia. Hasta crimen y nos ta puntra na unda e mayornan ta?
E mayornan t’ey, di berdad nan t’ey, pero nan ta neglisha e educacion di nan yiunan. Educacion ta cuminsa na cas y awor tambe otro excuus pa tira nan negligencia riba cierto fundacion, bisando cu ora bisa e mucha un cos e ta bay core yama telefon.
E mucha tin derecho di yama cuanto telefon cu e kier, pero ningun fundacion no por bin kibra e regla sagrado di un cas. Si e regla ta bon estableci, e mayornan ta bon den nan sapato, dunando bon ehempel, pa asina nan por coregi y educa nan yiu den orden y respet cuminsando cu e palabra di Dios, cual ta e base pa tur cos.
Hopi mayor ta bisa cu awor bo no por bati un mucha mas, pero awor nos kier bisa cu no ta sota so ta coreccion. Un no ta cu sla so un mucha ta tende, pero si bo por preveni, discusion innecesario, si bo dun’e educacion na tempo y bo no neglisha bo trabao como mayor. Nunca lo bo tin mester di uza forsa pa e mucha tende.
Pero nos ta gusta complace y laga cos bay for di man y pa despues nos resolve cu violencia. Mas pio ainda cu polis. Por ehempel, for di chikito un mucha mester compronde cu sin e autorisacion di su mayor e no por sali for di cas. Kiermen si e ta bay un caminda, e mester comunica cu su mayor.
Awor ta di unda ta bin cu mayor ta permiti un mucha sali di cas y drenta un auto cu glas scur. E mayor no sa cuanto hende tin den e auto ni tampoco na unda nan ta bay, pero e ta tende e simpel palabra “nos ta bay trip.” Den hopi caso ta resulta cu no tin ora di yega cas, ni ta respeta toque de queda no.
Tin biaha nos ta pensa cu e COVID aki ta causa morto, pero tambe e COVID ta mustra hopi cos cu a neglisha specialmente famia. Awor hopi hende ta haya sorpresa den nan mes cas, con rebelde nan yiu ta y kico nan a bini ta neglisha pa aña. Esey tambe ta un causa di tanto violencia domestico. Pasobra tin hopi hende cu ora nan mes realisa nan negligencia, nan no por soporta y ta rekeri na violencia.
Nos ta cera cu esaki Efesios Capitulo 6 versiculo 1 te cu 4 ta bisa asina aki: Yiunan obedece boso mayornan den Señor pasobra esaki ta husto. Honra bo tata y bo mama (cu ta e prome mandamento cu un promesa.) Pa bay bo bon y pa bo tin bida largo riba tera. Y boso tatanan, no provoca boso yiunan na rabia, pero lanta nan den e disciplina y instruccion di Señor.
