Pa falta di dominio propio nos ta confronta hopi problema social, pasobra dominio propio nos ta ricibi di Dios y e ta un fruta di Spirito Santo cual ta skirbi den Galationan Capitulo 5 verso 22.
Ora nos ta cana den Spirito (nos ta biba pa Cristo) nos ta vence e obranan di carni cual tur ta menciona den Galationan 5 verso 19-21.
Dominio propio ta bini di bo relacion cu Dios pero tambe di e educacion cu Mayor ta duna di e palabra di Dios.
Especialmente den bida matrimonial dominio propio tin un parti hopi importante cu ta trece fidelidad matrimonial, awel den e tempo cu nos ta biba awo fidelidad ta algo masha delicado, ya cu mundo completo ta aproba perversidad, ypa placer of falta di conocemento hopi hende ta bay tras di maldad.
Pero di berdad un persona integro sea homber of muhe mester tin dominio propio den su bida pa asina e por tin un matrimonio respeta den cual e ta ofrece amor na su esposa(o) y respet na su yiunan.
Pasobra una bes un persona cu ta casa tin un hende mas den su bida e ta falta tanto respet na su pareha como na su yiunan.
Anto dominio propio ta algo di gran balor , pero tambe ta mustra cu bo tin temor di Dios.
Ta hopi hende tin cu no tin dominio propio pero nan mes no sa esey , por ehempel bo conoce un hende awe, y awe mes of den un tempo corto bo tin relacion intimo cune esey ta nifica cu bo no tin dominio propio.
Ora bo no por keda sin bebe y wanta bo mes liber di alcohol hasta ora bo ta eherce bo labor diario, bo no tin dominio propio.
Ora bo no tin control riba cuanto placa bo ta gasta bo no tin dominio propio.
Ora bo no por hiba un discusion sin bira violento, insulta y bringa , bo no tin dominio propio.
Ora nos lesa Galationnan 5 versonan 19 te cu 26 nos por mira cuanto problema por wordo evita.
Awo bo por compronde dicon tin tanto violencia domestico, tanto divorcio, tanto bringamento, hopi redo, hopi accident bou influencia di alcohol. Pa falta di dominio propio hopi hende a perde nan trabou. Pa falta di dominio propio tin hopi famia kibra.
Awo nos tur por mira cla e necesidad di Dios den nos bida, e necesidad di Dios den matrimonio y famia, pasobra si nos kier bringa e crisis social e ta cuminsa cu nos mester busca dominio propio, y e unico caminda cu e por wordo hanja ta serca nos Señor CrIsto Hesus.
Tin hopi terapia pa siña hende, domina y controla nan bida, tin hasta ta practica hypnotismo. Serca Dios nos tin tur cos y gratis. Den Cristo nos tin dominio propio.
