Awe merdia a tuma luga firmamento di un acto oficial pa lanta un partido. Esaki a tuma luga na un oficina di notario. Ta trata di e partido Pueblo Prome, cu lo participa den eleccion parlamentario na september binidero. Awe bestuur a firma e acto oficial. Ta trata di Michael Wiliams como presidente di bestuur compaña pa Jan de Ruijter y demas personahenan cu a yuda lanta e partido.
No obstante cu Williams ta presidente di e bestuur, e lo ta riba lista tambe como un candidato. E partido ta bezig ta negosha cu diferente persona p’asina nan tambe join e partido. Pueblo ta anhela pa cambio, segun e presidente di bestuur. Segun Williams, por spera ex-minister, ex-parlamentario, parlamentario actual, consehero di e gobierno actual riba nan lista. Williams a enfoca cu e partido ta di tur hende, manera e nomber mes ta bisa, Pueblo Prome.
A puntr’e si nan ta habri pa traha cu otro partido. Segun Williams, nan lo respeta opinion di pueblo, si esey ta e mandato, ta esey lo pasa. “Den prome diescinco dia di gobernacion di partido Pueblo Prome, por nota accion,” Williams a bisa.
E partido no kier a menciona con nan lo hiba nan campaña. A enfoca si cu nan “no lo basila”, por spera nan den tur bario y skina. Aki dies dia lo inaugura nan cede y lo anuncia den mesun rosea e candidatonan di e partido.
