Pa Misa di Brazil ayera tabata un dia hopi importante pa motibo cu iglesia universal ta celebra dia di Cristo Rey, cu ta nomber di e misa di Brazil. Tambe e parokia di Brazil ta celebra 65 aña di existencia, pues ta dobel celebracion.
Segun Pastoor Andry Soto, pa nuebe dia largo nan a prepara pa e dia aki, cu decoracion special, danki na e fielnan di e bario mes, cu a haci un aporte generoso. Incluso a delanta Pasco, pasobra e ambiente a drenta cu alegria. E ta un speransa a pesar di e situacion dificil cu ta pasando den dje, pasobra Dios ta bini pa brinda speransa na pais Aruba.
Den e 65 aña di misa Cristo Rey, hopi hende a traha y aporta na e parokia. P’esey a recorda y resa pa nan, pasobra e pueblo di Brazil a ricibi ministerio di comunion ya cu nan kier sigui colabora y brinda nan aporte na esunnan den necesidad. Tambe tabatin tres minister nobo, tambe un grupo grandi a renoba nan compromiso.
Esaki ta algo cu nan kier a celebra den e tempo aki, el a expresa.
Pa nuebe dia largo nan tabatin un mensahe special, p’esey e parokianonan a duna nan aporte door di pone comestibel, un bleki of algo pa yuda esunnan den necesidad. Esaki ta e mensahe di mas bunita cu ta reconoce Hesucristo como Rey di universo di esunnan cu ta pasa den momentonan dificil.
