Un mayoria limita a desaproba e ley presenta awe dor di Minister di Finansa, Asuntonan Economico y Cultura, mr. Xiomara Ruiz-Maduro, relaciona cu e cuentanan anual di aña 2016 di Gobierno di Aruba. Un total di 11 miembro a vota contra y 7 miembro di Parlamento a vota na fabor di e ley. Consecuentemente e ley no a pasa y awor lo mester bay bek Controlaria General pa trat’e y evalu’e di nobo.
Manera informa di trempan, Parlamento awe tabata den un “deadlock” pa un ley pa aproba e cuentanan anual di aña 2016, bou gobernacion di Gabinete Mike Eman II. Si aprob’e ta un sosten na e maneho anterior, pero si desaprob’e ta un sorto di “brevet van onvermogen” pa e Minister di Finansa actual cu a presenta e ley y un desaprobacion tambe pa maneho di ex Minister Otmar Oduber cu a forma parti di ambos gabinete.
Minister Xiomara Ruiz a uza henter e dia awe pa purba convence e fraccionnan di coalicion cu ta miho pa aproba e cuentanan anual. Si no haci esey, lo stanca henter e operacion di Controlaria General, dor cu nan mester evalua e cifranan di nobo. A splica e Parlamentarionan cu e cifranan lo no cambia, pa colmo na 2016 Gobierno a cumpli cabalmente cu CAFT.
LocuaL MEP-POR-RED kier ta pa investiga e hecho cu Ministernan Dowers y Sevinger a surpasa nan presupuesto cu 10 miyon florin. Gobierno mes a splica cu e placa adicional ey a bay na overtime y salario di ambtenaarnan y cu ta dificil pa por a desvia. Asina mes coalicion kier mira un investigacion di e ex-mandatarionan.
Cu e decision awe di Parlamento, e cuentanan anual di 2016 lo regresa Controlaria General pa investigacion di nobo. Minister Ruiz a aclaria cu esey lo tin como consecuencia cu tur otro cuenta anual ta keda para awo. Tambe otro trabounan lo bay “on hold” pa por revisa e cuentanan aki. El a suplica su coleganan di partido pa coopera, pero e no a logra den su peticion.
Na final, algo pasa di 9:30pm e votacion a tuma luga den sala di Parlamento di Aruba. E resultado: 11 contra y 7 na fabor.
Despues di e reunion, tanto Parlamentario Arthur Dowers como Richard Arends a sigura cu e resultado aki ta un “brevet van onvermogen” pa Minister Xiomara Ruiz. Di otro banda, tanto fraccion di MEP, POR y RED tabata riba e mesun liña di pensamento, cu e decision aki bo tin nada di haber cu e ambtenaarnan cu a prepara e cuentanan anual sino mas bien e ta un decision politico. Nan ta sinti cu no por laga AVP “get away” cu e resultado aki di surpasa presupuesto, aunke cu nan votacion por tin problema pa nan coalicion.
