Pa loke t’e expresionnan di fraccion di RAIZ riba e maneho di perforacion pa producto di petroleo, Parlamentario Ricky Hoek, como presidente di MEP, a splica desde principio di e gobernacion aki, Gabinete Wever-Croes II, MEP y RAIZ tin un acuerdo di cooperacion cu otro y den tur cooperacion, colaboracion cu otro semper tin diferente pensamento.
Pero esey no kiermen cu no ta un problema grandi cu ta causa un conflicto. Si a yega asina leu cu Minister Glenbert Croes ta bay haci e perforacionnan aki, sigur esaki ta decision cu lo tuma den Conseho di Minister. Den e seno ey, e ministernan a combersa cu otro caba y ta di acuerdo.
Di parti di MEP, ta respeta e punto di bista di RAIZ y nan tambe ta compronde e punto di bista di MEP. No ta un punto cu ta trece friccion of problema innecesario, segun Hoek.
NO TA MIRA PARO DEN COALICION
Esaki no ta nifica cu esaki ta algo cu por spera paro den coalicion, Hoek a bisa. “Cada partido tin nan pensamento, nan opinion, pero nos ta respeta esey. Tur hende ta liber pa boost nan pensamento riba medio social,” Hoek a enfatisa.
Si bay n’e nivel caminda Conseho di Minister ta tuma decision, eynan ta caminda cu nan lo mester a papia tur cos caba y no tin problema den e caso ey.
TIN COMUNICACION
Tin comunicacion entre e partidonan, segun Hoek. Conseho di Minister ta tuma luga tur siman y mas cu un biaha pa siman tambe. E fraccionnan tambe ta sinta hunto den Parlamento como tambe onderling.
E parlamentario y e ministernan tambe ta sinta combersa. P’esey, segun Hoek, hopi biaha ta mira cos riba social media. Por ta nan a ventila algo, pero no por bisa cu tin un friccion. Ta e impresion cu hende ta haya eyfo, pero loke ta experencia di paden, caminda nan ta papia y expresa cu e coleganan di partido RAIZ, Hoek no por bisa cu aworaki tin friccion of cos no ta bayendo bon.
Semper tur hende tin nan opinion, cual por papia riba dje. Cu tin un punto grave pa friccion, esey no t’e caso aworaki.
“Mi no tin un bala di cristal y por bisa cu esey t’e direccion,” referiendo di un posibel friccion entre e partnernan den coalicion. Hoek ta sigui bisa cu e union t’ey, aunke el a bolbe enfatisa cu cada partido tin su opinion riba cierto puntonan, cual nan ta delibera cu otro. No mester alarma di un friccion of cos cu ta poni riba social media, Hoek a bisa por ultimo.
