Precisamente awe riba dia di eleccion, gerencia di Bright Bakery a informa tur nan clientenan, a traves di un carta den e panaderia, anunciando aumento di prijs di pan desde diahuebs awo dia 1 di juli 2021. Cuanto e aumento lo ta, no ta conoci ainda, of por lo menos esey nan no a anuncia awe den e comunicado. Si a hustifica e aumento debi na factornan for di nan alcance.
Gerencia di e panaderia mas grandi di Aruba a enfatisa cu e pandemia cu nos ta bibando aden tin efectonan drastico riba e economia mundial, den cual prijs di productonan y materia prima a aumenta. Ta bin acerca cu demanda halto riba rutanan di carga cu a tranca, tambe a percura pa aumento drastico den tarifa di transporte. Y como cu na Aruba nos ta importa tur producto pa produci pan, ta haci e flete casi inpagabel!
E panaderia a sigura di a haci tur lo posibel pa evita e efecto financiero lo minimo posibel. Nan a cumpli cu tur nan obligacionnan y den esaki a logra cu no mester a corta den salario di e trahadonan. Pa esey a haci uzo di subsidio di salario via gobierno.
“Pero, e gastonan ta sigui subi y a yega e momento cu nos no por absorb’e mas. Pues ta informa cu entrante diahuebs 1 di juli 2021 lo conoce un aumento den e prijs di nos productonan”, asina Bright Bakery a informa. Na final a priminti tur cliente di lo sigui brinda nos pueblo productonan di calidad halto.
