Diabierna ultimo tabata un dia sumamente importante pa Aruba, por lo menos p’e fiel creyentenan. Aki ta caminda cu den un forma masha special a presenta e prome Bijbel cu nos propio ortografia Papiamento. E ta despues di hopi tempo pero ta consider’e algo sumamente grandi.
Yvonne Isadora-Gumbs ta presidente di Sociedad di Bijbel Antiano, durante un entrevista cu 24ora.com el a conta cu pa crea algo asina, e ta tuma su tempo. Yudansa di hende di Aruba hunto cu United Bible Society y cu sponser di Hulanda a logra pa logra esaki. Diferente personahe clave cu tin conocemento di Papiamento hunto cu pastor a traha riba e proyecto aki.
A dura como dos aña den su totalidad pa por traha riba e Bijbel na Papiamento, aunke e idea t’ey di hopi aña caba. Entre nan tin persona cu a yuda pa hopi ora y di un forma boluntario. Bo no por hacie sin hende di Aruba, Gumbs a comenta. Tur hende di Aruba por lesa e Bijbel awo den nan lenga di curason, tin cu wak awo con ta sigui. Kisas algo electronico? Ta algo cu lo pensa riba dje.
Minister di Cultura, mr. Xiomara Maduro tabata presenta durante e ceremonia special aki. Claro, Papiamento ta algo sumamente importante pa nos cultura y cultura, bo tin cu bib’e. E mandatario a conta 24ora.com cu ta netamente e siman aki a celebra Dia Internacional di Lenga Materno y awo cu nos propio Bijbel, ta yen’e cu hopi emocion. E ta special pa un y tur mirando e importancia di un buki asina.
Minister-president, mr. Evelyn Wever-Croes tambe tabata presente y a combersa cu 24ora.com, el a conta cu p’e personalmente ta algo cu semper el a desea. Como lider di gobernacion e por conta cu e ta un hende cu ta kere hopi den Dios, claro, tin cu distingui estado y religion pero esey no ta laga afo cu como gobernante e tin cu sconde su fe den Dios. E ta kere firme cu nos tur tin e guia di nos Ser Supremo.
