Pa prome biaha Aruba a entrega un presupuesto cu ta basa riba e filosofia di “policy base budgeting”. Esaki ta resultado di e cooperacion cu tin via di Landspakket, Minister di Finansa mr. Geoffrey Wever a duna di conoce despues di a entrega presupuesto 2027.
E proyecto aki di e cooperacion entre Aruba y e team cu ta encarga pa ehecuta Landspakket ta hiba Aruba den un era moderno. A traha e presupuesto basa riba e plan di maneho cu cada minister tin y ta prome biaha cu a uza e sistema aki.
E mandatario a splica cu tradicionalmente ta traha un presupuesto basa riba datonan historico, pues ta uza con e tabata den e presupuesto anterior. Pero e sistema ta wak kico e minister kier bay ehecuta den e aña binidero. E minister(nan) mester a traha un plan di proyectonan cu ta bay realisa, cuanto material y personal lo mester y a base di esey a pone e suma di placa necesario. E ta exigi un nivel halto di disciplina. E resultado ta un presupuesto hopi mas detaya, mas trabou pero e ta duna esnan cu mester control un miho bista con e gasto of fondonan ta wordo aloca. “E ta mehora transparencia y e forma con ta traha un presupuesto mas detaya. E ta crea eficiencia y asina na final ta mira si ta logra e meta di e proyectonan cu kier a realisa.” E ta crea un situacion cu no mester bay tover cu loke tin pa realisa un proyecto.
Yega na esaki ta algo cu ta tuma su tempo. Pa por introducie a bin ta trahando basta tempo riba e sistema y falta ainda p’e bira un producto completo, pero e mandatario a indica cu e ta satisfecho cu e prome paso cu a tuma pa ehecuta e sistema.
En general e mandatario a indica di ta hopi satisfecho pasobra cu e presupuesto aki a haci cambio cu ta hisa e nivel di traha.
